Denunciouno onte o BNG da Baixa Limia, que sinala que o tempo de resposta a un aviso de lume no parque multiplicouse por catro.
A base funcionaba desde 1998 cun helicóptero que "garantía a intervención en menos de cinco minutos", indica.
Segundo censura, o dispositivo de extinción de incendios do Distrito XV perdeu este ano este "recurso fundamental" na loita contra os incendios na Baixa Limia, situado en Porqueirós (Muíños), "malia que o Plan de prevención e defensa contra os incendios forestais da Galiza 2020 a inclúe no mapa de bases".
Segundo fan notar desde a formación nacionalista, a base foi clausurada polo comuneiros de Porqueirós o 13 de xullo, despois de que fracasaran as negociacións entre a veciñanza e as empresas Inaer e Babcock MCS, encargadas da súa xestión.
Como explica, os comuneiros intentan desde hai dous anos que as empresas ofrezan unha contrapartida económica polo uso dos terreos e como compensación das molestias ocasionadas polo tráfico continuo de aeronaves e polo risco que supón o almacenamento de queroseno na parcela, a escasos quilómetros por riba da aldea.
O BNG critica que a Xunta e o Concello de Muíños "deitan a responsabilidade sobre Inaer, que xestiona o dispositivo das aeronaves, e néganse a pagar aos comuneiros de Porqueirós, propietarios dos terreos onde se asenta a base".