A Xunta recortou no ano 2023 o investimento por dependente en 130 euros

O ano 2023 despediuse na Galiza con perto de 73.700 persoas dependentes receptoras dalgún tipo de prestación. A cifra é importante —supera en 10.000 o total de poboación da sétima cidade galega en habitantes, Ferrol— e mostra como a dependencia é cada vez máis relevante no modelo de benestar. O presidente da Xunta da Galiza, Alfonso Rueda, louvaba a semana pasada no seu discurso de investidura no Parlamento o traballo desenvolvido nestes anos polo Goberno galego neste ámbito. Porén, o novo informe do Observatorio Estatal da Dependencia sinala as sombras existentes na dependencia na Galiza, concentradas nos recortes en investimento, as demoras na tramitación dos expedientes ou a taxa de cobertura; aspectos todos eles con incidencia no día a día das persoas dependentes. Pensións e dependencia: a poboación maior de 65 anos, cada vez "máis necesitada de atención" En 2023 o investimento por persoa dependente atendida na Galiza foi 130 euros menos que no exercicio anterior. De 4.856 euros a 4.726. O que se gasta por persoa dependente na Galiza é, ademais, moi inferior ao que se gasta de media estatal, que son 6.103 euros. Así pois, nos dependentes galegos e galegas o investimento por cada un deles e delas é 1.376 euros menos que nos dependentes do Estado (23% menos). De igual forma, o investimento público por habitante (126 euros) está 49 euros por baixo da media estatal, como consecuencia do menor investimento dos servizos. O documento do Observatorio apunta tamén que a Xunta reduciu en 2023 a súa achega á atención á dependencia en case 10 millóns de euros. Maior custo para a persoa dependente O Sistema para a Autonomía e Atención á Dependencia (SAAD) na Galiza ten un custo directo duns 503 millóns de euros, segundo o Observatorio. Deles, o Estado asume 41,7% e a Administración galega 35,8%, mentres que as persoas usuarias asumen. A Galiza é a comunidade do Estado que menos inviste en dependencia 22,5%. A nivel estatal, as persoas beneficiarias do SAAD asumen só 20,4% do custo (2,1 puntos menos que as galegas), e o Goberno estatal e as autonomías invisten o resto: as comunidades fanse cargo de 48 % e Estado de 31,5 %. Taxa de cobertura Tamén no que atinxe á taxa de cobertura en dependencia sae perdendo Galiza na comparativa coa media estatal. Aquí esa taxa é de 27,3 PIA (siglas de Programa Individual de Atención, informe que determina as modalidades de intervención máis adecuadas para a persoa dependente) por 1.000 habitantes, cando no Estado é de 29,7, o que representa 2,3 puntos de diferenza. Entre as prestacións de dependencia, o Servizo de Axuda ao Fogar (SAF) é o máis demandado e representa 28,4% da carteira de servizos, porcentaxe moi superior á media das autonomías, onde é 18,5%. O SAF atendeu en 2023 máis de 25.400 dependentes cunha intensidade media de 46 horas mensuais. Porén, 2023 rexistrou un descenso de 1.217 usuarias (3,5 puntos menos que en 2022). Mortes en lista de espera A Lei da dependencia fai 18 anos e unha parte importante da mesma segue sen ter cumprimento efectivo na vida real das persoas dependentes e das súas familias. A mostra máis evidente é que en 2023 na Galiza faleceron, segundo os datos do Observatorio, 346 persoas que figuraban na lista de espera de dependencia, con dereito pendente de prestación. No que respecta aos días que teñen que agardar na Galiza as persoas dependentes e as súas familias por unha resolución que recoñeza os seus dereitos estes foron en 2023 de 362. Son 38 días máis que a media estatal de espera (324). A Lei de dependencia aprobada en 2006, que vai cara ás dúas décadas de vida, recollía na súa disposición final primeira que "o prazo máximo, entre a data de entrada da solicitude e a de resolución de recoñecemento da prestación de dependencia será de seis meses, independentemente de que a Administración competente estabelecese un procedemento diferenciado para o recoñecemento da situación de dependencia e o de prestacións". A Galiza case duplica ese tempo fixado por lei. A promesa proclama por Alfonso Rueda en 2023 de reducir á metade o tempo de tramitación a día de hoxe non deixou pegada. 35% da redución das listas de espera en dependencia débese á morte da persoa Suspenso da Xunta A Asociación de Directores e Xerentes de Servizos Sociais suspendía en 2023 a Xunta da Galiza pola súa xestión en materia de dependencia nun estudo —con datos de 2022—. Indicaba que o conxunto das comunidades destinaron en 2022 de media ao financiamento deste servizo 74% do seu custo total, porén a Xunta só dedicou 65%. Así, o Goberno galego colocábase de fechacancelas nunha clasificación que lideraban Euskadi, cunha achega de 86%, seguida de Nafarroa (82%) e o País Valencià (79%). Agresión en Vigo Unha usuaria do Complexo Residencial de Atención a Persoas Dependentes CRAPD 2 de Vigo foi hospitalizada esta cuarta feira ao ser agredida por outro residente. Ambos son do colectivo de persoas en emerxencia social. Os sindicatos denunciaron que a Xunta mantén en residencias de maiores e persoas dependentes casos de emerxencia social e psiquiatría sen atención nin recursos.