A Xunta informa de que todos os incendios están baixo control por primeira vez desde hai máis de dúas semanas

A vaga de incendios que desde hai máis de dúas semanas bate na Galiza parece achegarse á súa fin, posto que por primeira vez desde o seu inicio, non se notifica ningún foco activo en toda o país.

A Consellaría de Medio Rural así o recolle no seu último parte, con datos solicitados até as 14.45 horas desta quinta feira, e onde notifican a estabilización dos focos da Pobra do Brollón (Terra de Lemos), orixinado a segunda feira na parroquia de Abrence e que afecta unhas 900 hectáreas; e de Avión (O Ribeiro), iniciado na parroquia de Nieva cunha afectación de 250 hectáreas.

Esta mañá tamén se daba por controlado o maior incendio até o momento, o que queimou ao redor de 30.000 hectáreas en Larouco, o maior na historia da Galiza.

Igualmente, nas últimas horas déronse por controlados os lumes de Chandrexa de Queixa (Requeixo e Parafita, mentres que o foco de Vilariño de Conso segue estabilizado), con 19.000 hectáreas afectadas, e Carballeda de Avia-Beade, con 4.000 hectáreas.

Tamén na provincia de Ourense seguen controlados os incendios da Mezquita (10.000 hectáreas), Oímbra-Xinzo de Limia (17.000 hectáreas), Vilardevós-Vilar de Cervos (900 hectáreas), Montederramo (120 hectáreas), e Maceda (3.500 hectáreas); mentres que continúa estabilizado o incendio de Carballeda de Valdeorras-Casaio (5.000 hectáreas).