Dos 27,5 millóns de euros de 2020 aos 29,7 millóns de 2023, a partida da Xunta da Galiza para o pagamento do profesorado de relixión nesta lexislatura non para de aumentar. Foi de 28,3 millóns en 2021 e de case 29 millóns o ano pasado, 2022. Falta por saber canto asignará a esta finalidade a Consellaría de Educación nos orzamentos de 2024 que están agora nos seus primeiros pasos de elaboración. A falta dese dato, no que vai de lexislatura Educación gastou 114 millóns en pagar docentes de relixión. O Tribunal Supremo (TS) unificou doutrina a inicios de ano e estabeleceu que as profesoras e os profesores de relixión debían ter contrato indefinido.
Na Galiza o persoal docente desta materia no curso 2022/2023 —último contabilizado— alcanzou as 686 persoas, segundo os datos da Consellaría de Educación. Son 133 menos que hai unha década, o curso 2012/2013, cando eran 849. Porén, a partida que a Xunta destina a pagar eses profesores e profesoras apenas variou, era de 29,5 millóns de euros hai unha década e é de 29,7 millóns en 2023.
Este profesorado non accede ao seu posto a través de exames ou oposicións, senón que é escollido pola Igrexa. É ela quen decide que determinada persoa, que vai ser paga con diñeiro público, sexa contratada para impartir esta materia, e tamén quen decide sobre a súa continuidade ou despedimento.
O profesorado de relixión en Secundaria, Formación Profesional e outras ensinanzas supuxo o curso anterior para a Consellaría un gasto de 10,4 millóns de euros. Aquí o número de docentes é de 218. Para Ensino Infantil, Primaria e ESO, esa cantidade elévase a 18,5 millóns, sendo o número de profesores e profesoras, 468.
Eses case 30 millóns de euros nos orzamentos de 2023 para pagar este profesorado elixido polos Episcopados —e que deben ter a declaración eclesiástica de idoneidade outorgada pola Diocese correspondente e que dá fe dunha doutrina "recta" e testemuña a "vida cristiá"— equivalen, por exemplo, a 60% do que a Consellaría destina a comedores escolares, ao redor de 50 millóns de euros, e que atende 60.000 alumnos e alumnas.
Pública e privada
Por volta de 160.000 alumnos e alumnas galegas cursaron a materia de relixión en 2022/23. Os datos do Ministerio de Educación mostran unha diferenza máis que notábel á hora de optar por relixión entre o estudantado de centros públicos e o de centros concertados/privados. No que respecta a Primaria, 53% do alumnado na pública cursa esta materia, mentres que na concertada e privada a porcentaxe elévase a 77,6%.
Unha fenda que tamén se rexistra en Secundaria —51% de estudantes na pública elixen relixión por un 75% nos outros—. No Bacharelato é onde a diferenza máis se alarga: mentres apenas 30% de estudantes dos centros públicos cursan relixión, nos concertados e privados esa porcentaxe é 33 puntos maior: 63%, o duplo.