A realidade nas UCI desmente os datos da Xunta

A tensión non alivia nas Unidades de Coidados Intensivos da Galiza. Ao contrario. A presión asistencial vai a máis nas áreas de críticos, onde tamén aumentan as dificultades para acomodar os doentes e prestar unha atención de calidade. "Aínda temos capacidade para resistir", afirmou o presidente do Goberno galego, Alberto Núñez Feixoo, a pasada quinta feira tras a reunión do Consello da Xunta. Mais o relato que traslada o persoal sanitario desde a primeira liña da pandemia reflicte unha realidade máis urxente. Unidades específicas completas, sen máis camas dispoñíbeis; profesionais esgotadas, impotentes ante o ritmo de ingresos, e insuficientes, en vista do incremento da demanda de coidados especializados. A ocupación de camas UCI bateu por terceiro día consecutivo a súa propia marca Segundo o último balance facilitado pola Consellaría de Sanidade, nas últimas 24 horas as Unidades de Coidados Intensivos dos hospitais galegos recibiron 17 novos pacientes en estado crítico até alcanzar os 210, 73 doentes máis que hai unha semana. Así, a ocupación de camas UCI bate, por terceiro día consecutivo, a súa propia marca desde a chegada do coronavirus. Semanas difíciles O incremento de contaxios rexistrados tras as semanas de Nadal derivou nun aumento dos ingresos hospitalarios que tamén acaba afectando ás unidades específicas de coidados intensivos. Segundo recoñeceu Núñez Feixoo, aínda quedan "unhas semanas moi difíciles" que non fan prever unha diminución da ocupación UCI. Aí é onde o presidente galego sitúa a "máxima preocupación", nomeadamente nas áreas sanitarias da Coruña, Santiago e Ourense, seguidas das de Ferrol e Pontevedra, e máis de lonxe, das de Vigo e Lugo, que son, dixo, as que contan cos "maiores hospitais" e maior capacidade de acollida, tanto en plantas convencionais como en unidades de críticos. Os cálculos da Xunta Porén, Alberto Núñez Feixoo volveu sinalar que a ocupación de camas UCI na Galiza sitúase na metade das cotas máis elevadas rexistradas no resto do Estado. O titular do Executivo galego salientou a pasada quinta feira que, con 193 pacientes ingresados, Galiza mantiña unha porcentaxe de ocupación de 25%, por debaixo do 42% da media estatal, do 46% da Comunitat Valenciana e do 58% de Catalunya. É unha das cifras máis baixas de todos os territorios, resultado dun cálculo que no canto de empregar o número de camas reais de UCI dispoñíbeis nos hospitais galegos, emprega o número estimado de camas das que podería chegar a dispor o Servizo Galego de Saúde en caso de seren necesarias. A realidade das camas UCI A fórmula empregada pola Xunta para taxar a carga das Unidades de Coidados Intensivos substitúe a cifra de camas existentes polo número de camas posíbeis. Antes da chegada do coronavirus, o Servizo Galego de Saúde contaba con 163 camas en Unidades de Coidados Intensivos segundo os fatos facilitados por CCOO-Sanidade a Nós Diario na primavera de 2020. No inicio da pandemia o Sergas confirmou esa dispoñibilidade inicial e avanzou a incorporación de novos postos adaptados en áreas de reanimación que xa desde as primeiras semanas gozaron das condicións necesarias e da consideración de camas habilitadas para coidados intensivos. A xunta reduce o impacto da Covid en UCI ao estimar un número de camas dispoñíbeis que non o están Desde o mes de marzo Galiza contou con 274 camas UCI dispoñíbeis para atender doentes críticos cun resultado positivo por coronavirus. É a cifra de referencia que emprega o especialista en Análises Clínicas Luís Vázquez, quen ofrece a diario os datos da evolución da Covid-19 en cada unha das áreas sanitarias da Galiza e no conxunto do territorio. "Creo que é a cifra máis realista porque atende ás camas habilitadas e dispoñíbeis, con persoal especialista asignado", asegura. Vázquez non considera as camas de incorporación máis recente en unidades de reanimación, en áreas de recuperación postanestésica, en quirófanos; nin tampouco as que pode chegar a haber nos hospitais de campaña previstos polo Goberno galego na fase catro do pan de continxencia. A ocupación das UCI é 76,6% segundo a cifra de camas reais dispoñíbeis. A Xunta rebaixa o impacto a 27,3% Todos estes recursos, futuríbeis, a maioría, son os que suma a Xunta para afirmar que o Servizo Galego de Saúde dispón entre hospitais públicos, privados e prazas extrahospitalarias máis de 750 camas UCI. Máis na práctica son inaccesíbeis, porque non existen. E rebaixan o impacto real da pandemia no sistema galego de saúde. Pola regra de tres que fai servir a o Executivo galego, con 210 paciente ingresados en unidades de críticos a porcentaxe de ocupación sitúase en 27,3%. Segundo os cálculos de Luís Vázquez, a carga asistencial nas áreas de coidados críticos aumenta, cunha ocupación de 76,6% das camas UCI en funcionamento. Urxen especialistas UCI A capacidade do sistema galego para producir camas UCI forma parte dos argumentos do Goberno da Xunta xa desde a primeira vaga. Ás portas da desescalada, no mes de maio, Sanidade xa advertira que estaba en condicións de habilitar entre 400 e 500 camas de coidados intensivos para cumprir coa criterios do Estado que exixía entre 1,5 e dúas camas UCI por cada 10.000 habitantes para iniciar o desconfinamento. Faltan intensivistas. A proba no chamamento do presidente da Xunta aos especialistas de UCI interesados en traballar na sanidade galega Na actualidade sinala unha capacidade aínda maior á que a sanidade privada contribúe con 87 camas UCI reais, aseguran a Nós Diario fontes de Ahosgal, a Asociación de Hospitais da Galiza da que son parte 13 centros e clínicas privadas. Segundo os seus cálculos, poderían chegar a adaptar 65 postos máis, se fose preciso, "pero o problema é a falta de persoal especialista. As camas UCI exixen intensivistas, e non hai, nin para a privada nin para a pública. E a proba está no chamamento do presidente da Xunta aos especialistas de UCI interesados en traballar na sanidade galega". A mesma dificultade exhiben desde a área sanitaria de Ferrol. "O problema xa non é tanto de espazo como de persoal. A UCI require profesionais formados", asegura Sandra Martínez, voceira de CIG-Saúde na comarca. "O Arquitecto Marcide iniciou a pandemia con só 10 camas UCI. Chegamos aos 30 doentes críticos. Foi preciso reconverter a área de reanimación e habilitar a antiga UCI do Hospital Naval, botar man de todos os anestesistas, de persoal de enfermaría doutros servizos, ademais de sucesivos traslados a outras áreas sanitarias" para aliviar unha presión crítica. Persoal sanitario advirte falta de especialistas e máis estres que na primeira vaga A área sanitaria de Ferrol suma 25 pacientes críticos, os mesmos que Pontevedra, e ambas as dúas por detrás de Santiago, con 40 e A Coruña, con 69. Lonxe de decaer, os ingresos nesta última área seguen a aumentar, tamén en UCI. En 24 horas, 10 e 11 un día antes o que obrigou a acomodar doentes críticos con Covid e quirófanos, tras esgotar os coidados intensivos e as áreas de reanimación. Ourense experimentou a mesma evolución. "Contamos de partida con 56 camas, 22 de UCI 14 de reanimación e 20 de espertar. Todas elas está dotadas con respiradores e monitorización", explica a Nós Diario Félix Rubial, xerente da área sanitaria. "Ademais dispomos de espazos habilitados en tres quirófanos, con tres camas cada". De precisaren máis postos para doentes críticos "teriamos que ir prescindindo de quirófanos, até 14", confirma. Galiza, un só hospital Desde o Chuac aseguran contar con especialistas suficientes malia as continuas ampliacións de camas. "Sen persoal non se abren camas porque non podemos asegurar que funcionen", conclúen sen ofrecer máis detalles. Corremos en vez de traballar, impotentes, malia coñecer a doenza e os coidados. O virus ten máis forza Con todo, as diferenzas e as necesidades específicas de cada área esvaécense tras a tapadeira do "hospital único" co que conta Galiza, declarou Núñez Feixoo, formado polo "conxunto de camas de UCI e camas en planta do Servizo Galego de Saúde". "Os pacientes poderán ir a un ou outro hospital en función da necesidade", engadiu. Os ingresos, advirte Luís Vázquez, continuarán. "De cada 100 novos contaxios, seis acaban no hospital e un chega á UCI", polo que o ritmo de transmisión seguirá a marcar a tensión asistencial, máis grave que na primeira vaga, incide o persoal sanitario. "Estamos en mínimos, os pacientes chegan un detrás doutro. Corremos en vez de traballar, impotentes, malia coñecer a doenza e os coidados. O virus ten máis forza", manifesta persoal do Hospital Clínico de Santiago.