Patronal da sanidade privada recrimina á Xunta que non use as súas camas e UCIs e opte por hospitais de campaña

A Alianza da Sanidade Privada Española (ASPE) informou nesta sexta feira, 3 de abril, de que os seus centros e as súas UCI dispoñen aínda de camas libres para acoller pacientes. Apostou, neste sentido, por derivar a estes hospitais privados "todo o resto das afeccións ou patoloxías" que estean en curso neste momento, para "liberar" os medios públicos e se centren na crise da COVID-19.

"Chama a atención", sinalaron que "algunhas comunidades autónomas decidan levantar infraestruturas provisionais de continxencia, en referencia aos hospitais de campaña, para atender a presión de ingresos dos afectados polo coronavirus, cando dispoñen e non empregan dos recursos da sanidade privada".

No caso galego, apuntan, a Xunta "parece dar ordes expresas recentes de que os pacientes vaian a hospitais de campaña e non a centros sanitarios privados", denunciou a ASPE.

O persoal a disposición da crise en centros sanitarios con internamento é de 93.000 profesionais a niveld e Estado, entre sanitarios e sociosanitarios, explicou a asociación. Ademais, a infraestrutura a disposición a nivel estatal é de 52.000 camas de carácter xeral e 2.800 de UCI.

Neste sentido, a ASPE fixo un chamamento "para que empreguen a fondo toda a nosa capacidade instalada alí onde sexa necesario, en lugar de levantar hospitais de campaña, porque estamos completamente convencidos da capacidade de traballo conxunto dunha sanidade única".