A Xunta decide finalmente pechar perimetralmente toda Galiza

A Xunta comunicou esta tarde que finalmente non só limitará a fronteira con Portugal para evitar escapadas turísticas durante a ponte senón que fechará perimetralmente toda Galiza para evitar a entrada e saída de cidadáns agora que a segunda onda do coronavirus parece remitir.

Fontes do Executivo galego explicaron que o país estará fechado entre as 24 horas desta sexta feira, 4 de decembro, e a media noite da cuarta feira da próxima semana, día 9. Desta maneira pretende evitar desprazamentos e riscos innecesarios.

Se ben é certo que pola mañá só se falaba de pór limitacións aos movementos cara terras lusas, por recomendación do comité clínico de seguimento de evolución da pandemia, finalmente considerouse que non é viábel controlar un confinamento "por partes".

"Imos consultar ao Goberno español se esa restrición de mobilidade con Portugal implica o feche perimetral de toda Galiza, pero nós entendemos que Galiza pode seguir aberta", dicía ao principio o presidente, Alberto Núñez Feixoo.

Pero ao final non será preciso a colaboración de Exteriores do Goberno do Estado español. Galiza estará fechada tanto para ir ao país veciño como a outros territorios como da península. Así tamén se pon control ao acceso de visitantes desde outras zonas.

Malia que moitas zonas tiñan previsto esa mesma estratexia de feche perimetral, non se daba en todas e así se toman as medidas oportunas para evitar un incremento dos contaxios na nazón. Porén, si haberá unha desescalada para a propia cidadanía galega.