Xulgan na Coruña un home acusado de ofrecer emprego a mulleres nun club co obxectivo de agredilas sexualmente
Comezou coa declaración, a porta fechada, de vítimas nunha vista na que Fiscalía pide 71 anos de cárcere e SOS Racismo, 145.
A sede da Audiencia Provincial da Coruña acolle desde esta terza feira o xuízo contra un acusado de agresión sexual a tres mulleres, unha delas menor de idade, ás que captaba a través de anuncios de traballo e ás que trataba de convencer para exercer a prostitución.
Fiscalía pide para o home, en prisión provisional por esta causa desde maio de 2024, penas que suman 71 anos de prisión, unha petición que a acusación, exercida por SOS Racismo, eleva a 145 mentres a defensa reclama a libre absolución.
A vista, que continuará esta cuarta feira e proseguirá en xaneiro, comezou coa declaración de vítimas, que o fixeron a porta fechada.
Segundo o escrito fiscal, o acusado recrutou desde principios do ano 2023 persoas para traballar nun futuro club de alterne en Ordes, en concreto, captábaas a través de anuncios para realizar labores de limpeza, entre outras.
Ademais, tratou de convencelas nalgúns casos para exercer a prostitución, lográndoo nalgunha ocasión, con todo, "o propósito era manter relacións sexuais con elas".
"Adormecemento" das vítimas
Para iso, desde finais de marzo de 2023, contaba cunha substancia que, mesturada con alcohol, "xeraba desorientación, perdida parcial e/ou total de conciencia e adormecemento de todos os membros".
Deste modo, o escrito fiscal recolle como, entre o 21 de marzo de 2023 e o 1 de abril de 2023, unha das vítimas reuniuse co acusado tras acordar co mesmo empezar a traballar nas obras de reforma que se estaban levando a cabo no denominado 'Club Pasión'.
Unha vez alí, foron a un estabelecemento próximo e, durante o transcurso dunha conversación na que trataba de convencela para que exercese a prostitución, convidouna a dúas consumicións alcohólicas nas que o acusado introduciu a substancia referida.
O cal xerou na muller desmaio, desorientación e perda de conciencia parcial, así, o acusado conduciuna a un lugar apartado e agrediuna sexualmente. Finalmente, esta perdeu totalmente a consciencia, volvéndoa recobrar ao día seguinte nunha habitación de hotel na mesma localidade de Mesón do Vento.
Outras vítimas
Entre o 1 de abril e o 6 de abril de 2023 o procesado convenceu outra das vítimas para que exercese a prostitución —aínda que inicialmente ela contactou con el por unha oferta de traballo de limpeza— e, despois de convidala a cear e insistir en que bebese viño, díxolle que bebese un trago de alcol.
Con todo, ante a insistencia do acusado, aceptou e inxeriu a bebida na que o procesado introducira a substancia xa mencionada e sufriu os efectos referidos. "O cal foi aproveitado polo acusado para conducila a unha habitación", onde a agrediu sexualmente.
Ademais, na noite do 7 de abril, "aproveitando que non podía abandonar o club ante a total dependencia económica do acusado, introduciuse na súa habitación con igual ánimo, para manter relacións sexuais" e volveuna a agredir.
Outra das vítimas, menor na data dos feitos, contactou nos primeiros días do mes de abril de 2023 co home, ao ofrecer este un traballo para camareiras, chegando a acordar con el ser empregada como camareira no mencionado club.
A partir dese momento, o procesado comezou a convidala a consumicións alcohólicas nas que introducía a substancia referida. Así, tras inxerir unha destas bebidas, a moza "comezou a sentirse mareada, perdendo a consciencia e chegando a recobrala en determinados momentos durante a noite". Segundo o escrito, penetrouna tanto anal como vaxinalmente en varias ocasións.
Petición de condena
Por todo iso, entre outras medidas, Fiscalía pide 10 anos de prisión para o acusado polo primeiro caso por un delito de violación agravada, prohibición de comunicarse coa vítima e aproximarse a menos de 300 metros durante 11 anos, así como 7 anos de liberdade vixiada. Aliás, o pago de 30.000 euros por razón de secuelas psíquicas e 20.000 por razón de danos morais.
No segundo caso, solicita 10 anos de cárcere por violación agravada, prohibición de comunicarse coa vítima e aproximarse a menos de 300 metros durante 11 anos, 7 anos de liberdade vixiada e o pago de 30.000 euros por razón de secuelas psíquicas e 40.000 por razón de danos morais. Reclama, tamén, seis anos de prisión por un delito de violación.
Finalmente, polo último caso, o Ministerio Público pide por cada un dos tres delitos de violación cometidos 15 anos de cárcere e prohibición de comunicarse por calquera medio e de aproximarse a menos de 300 de metros por 21 anos, así como liberdade vixiada por outros tantos anos e a contía de 40.000 euros por razón de secuelas psíquicas e 90.000 euros por razón de danos moral.
