O xuízo do Alvia continúa esta terza feira cunha xornada centrada no sistema de seguranza
O xuízo polo accidente do tren Alvia ocorrido en Angrois (Santiago de Compostela) en xullo de 2013 (no cal morreron 80 persoas e 145 resultaron feridas) retómase esta terza feira cunha intensa xornada na que declararán cinco testemuñas, entre elas dous traballadores das empresas que forneceron o sistema de seguridade e dous expertos no Sistema Europeo de Xestión do Tráfico Ferroviario 'ERTMS'.
Haberá sesión tamén a quinta feira día 10 e a sexta día 11, datas en que están convocados unicamente unha persoa por día: quen era director xeneral de Operacións e Enxeñería de Adif na época na que a liña se puxo en servizo e na cal se produciu o sinistro (Alfonso Ochoa, o 10) e un técnico tamén de Adif (Juan Antonio Sánchez Corrales, o 11).
Así, para o día 8 está citada, en primeiro lugar, unha traballadora das empresas Dimetronics (Siemens) e Thales, que conformaban a unión temporal de empresas (UTE) provedora do sistema de seguridade 'ERTMS'.
Na súa declaración en calidade de acusado, o ex director de seguridade de Adif, Andrés Cortabitarte, negou ter competencia sobre análise de riscos e, de feito, descargou responsabilidades, entre outros, nestas empresas, que achegaron un dossier de seguridade sobre o seu labor na liña Ourense-Santiago.
"Que a UTE elabore o dossier de seguridade e despois haxa unha avaliación independente non significa que vostedes teñan que aceptar iso sen máis", chegou a reprender o fiscal a Cortabitarte, para atribuírlle unha "actuación pasiva".
"Non, non é así. Nós non imos avaliar o avaliado. Iso é un feito fundamental. A UTE Siemens-Dimetronic cando fan o dossier de seguridade fano a través dun proceso", respondeu Cortabitarte.
Outra das persoas citadas a declarar esta terza feira é un empregado de Bombardier, responsábel do deseño e instalación do 'ERTMS' embarcado no tren, o que xerou incompatibilidades que levaron á súa desconexión, previa solicitude por parte do xefe de seguridade de Renfe e autorización por parte de Cortabitarte.
"Faltan á verdade"
Xunto a un portavoz do sindicato de maquinistas, tamén están citados para a terza dous expertos no 'ERTMS': Jorge Iglesias e Jaime Tamarit.
O segundo é ex director do laboratorio de interoperabilidade ferroviaria do Centro de Estudos e Experimentación de Obras Públicas do Ministerio de Fomento (Cedex).
Jorge Iglesias foi, en concreto, o coordinador do grupo encargado de elaborar as regras de enxeñería para ''ERTMS' Nivel 1 e 2 e o coordinador técnico para a posta en servizo da liña.
A dirección xeral da que dependía era aquela á fronte da cal estaba Alfonso Ochoa (o citado para o día 10) na época en que se puxo en servizo a liña e no momento do descarrilamento.
Iglesias escribiu ao presidente da comisión de investigación do Congreso sobre o sinistro do Alvia para denunciar que se estaba "faltando á verdade", en alusión a Ochoa.
Tratou de desmontar, coa súa tese, a teoría (mantida por Ochoa) de que as regras de enxeñería de Adif, que el elaborou, obrigaban a que o cambio de proxecto da liña implicase a retirada do sistema de supervisión continua da velocidade 'ERTMS' dos últimos quilómetros, pouco antes da chegada á estación compostelá e onde aparece a primeira curva (a da Grandeira) despois dun traxecto case rectilíneo.