Unhas xornadas poñen o foco no "maltrato estrutural" que padecen as persoas maiores

A Casa Xohana Torres de Compostela acollerá o 8 de novembro un encontro monográfico para analizar as causas e consecuencias do maltrato ás persoas maiores, cunha mirada posta nas políticas públicas, nos modelos de coidado e no funcionamento das residencias. A convocatoria, da man da Plataforma Pensionistas Compostela, defende que o maltrato é unha violación de dereitos humanos e civís agravada pola vulnerabilidade, e chama a debater como se manifesta e como combatelo.

A Plataforma alerta de que moitos protocolos institucionais seguen máis centrados na esfera persoal que na pública, malia ser precisamente no ámbito público onde se producirían con maior frecuencia as situacións de dano e onde as administracións teñen maior responsabilidade.

A entidade cualifica como "maltrato estrutural" as políticas antisociais e a súa normalización, ao entender que "corrompen e envelenan o sistema de coidados" e agravan un modelo de xestión residencial "deplorábel" no país. Sinala que a Administración adoita eludir responsabilidades e derivar a culpa cara ao persoal, que, en moitos casos, traballa en condicións inhumanas.

A análise enumera prácticas e omisións que se consideran parte dese "maltrato estrutural": a falta de dispositivos sanitarios de atención xeriátrica especializada; a tendencia a atribuír á idade calquera doenza; normas ríxidas que despersonalizan; residencias afastadas dos fogares que provocan desarraigamento; xestión neglixente; infantilización no trato e vulneración da intimidade; abuso da contención física e química; e estafas económicas e apropiación indebida de bens.

Outro dos puntos de alerta é a asunción, por parte de moitas persoas maiores, de tarefas de coidado de familiares con adiccións ou doenzas mentais por falta de recursos comunitarios, o que desde a Plataforma interpretan como evidencia do fracaso dos dispositivos asistenciais que deberían garantir rehabilitación e reinserción social para a xente nova afectada.

Segundo a Plataforma Pensionistas Compostela, todas estas realidades están na base da creación destas xornadas e xustifican unha reflexión colectiva "sobre o maltrato ás persoas maiores" e os cambios que cómpre introducir nas políticas e na práctica diaria.

Programa

• 9.30–10 | Presentación e apertura

Manuela Fraguela Seoane, voceira da Plataforma de pensionistas de Compostela, e Goretti Sanmartín, alcaldesa da capital galega.

• 10–11.30 | Mesa xurídica

Ana López Suevos (maxistrada) e Antía Alvarado Arias (letrada da Administración de Xustiza): "Delito de maltrato familiar. Especial referencia á incidencia dos trastornos e patoloxías psiquiátricas".

• 12–13.30 | Mesa sanitaria

Antía Diéguez Quintarós (psiquiatra forense) e Iria Veiga Ramos (psiquiatra no Sergas): "Que se pode Mellorar na asistencia á saúde mental".

María Gómez Pardo (psicóloga nos CIMS de Melide e Arzúa): "A familia: na saúde e na enfermidade".

• 16.30–18 | Mesa de traballo social

Diego Rodríguez (TS do Concello de Cerdido), María de la O Fresco Torrente (TS do centro de saúde de Pontedeume) e Emma Lamas (TS do H.A. Marcide de Ferrol): "Os malos tratos aos maiores: a visión desde o traballo social".

• 18–20 | Debate e conclusións

Manuel Basante, Ana Belén Blanco Varela, Carlos Ferrás, Berta Conde López e Yolanda García Vázquez.