De viños para ficarmos sen palabras

Plántase cun sistema de condución en “emparrado”, o que se coñece como “viticultura etrusca”, e que se reparten en 13 predios nas parroquias de Camanzo de abaixo e de arriba (Vila de Cruces), aquí hai sete predios, situados ao carón da adega, que suman 5,61 hectáreas; e as de Añobre (Vila de Cruces) e Cira (Silleda), onde se sitúan os seis predios restantes. Desde o ano 2000 todos os predios están traballados con cuberta vexetal permanente e sen uso de herbicidas, unha viticultura sostíbel e reforzando a biodiversidade do viñedo. A aposta definitiva comezou formalmente a mediados de 2015 coa incorporación dun biólogo ao equipo, buscando mellorar en cuestións relacionadas coa ecoloxía e a biodiversidade e desde entón están a pór en valor o seu “ecosistema”. Os viñedos están situados nun val cunha climatoloxía e edafoloxía especial, aproximadamente de 8 km2, na marxe esquerda do tramo medio do río Ulla e situado na parte baixa dos antigos dominios do Convento de San Salvador de Camanzo, polo tanto os viñedos fican dentro dos “límites do convento” e representan a auténtica “viticultura monacal”. O val está drenado polo regueiro Fornotilleiro, unha corrente continua de 3.800 metros de lonxitude que desemboca no río Ulla. A paisaxe do viñedo repártese entre zonas agrícolas e dous tipos de bosque (ribeira fluvial e de carballo e castaño, ou sexa, atlántico) moi próximo á confluencia dos ríos Ulla e Deza (que separa as provincias da Coruña e Pontevedra), onde se conforma unha zona de especial conservación: sistema fluvial Ulla-Deza, pertencente á Rede Natura 2000 (Rede de espazos naturais protexidos de Europa). Os viñedos están situados na parte baixa do val de Camanzo (Vila de Cruces), ao pé do monte Castromouro (286 metros sobre o nivel do mar) que protexe das borrascas do suroeste. Todo o viñedo ten orientación sur-leste e as cotas máximas e mínimas oscilan entre os 80 e os 120 metros con pendente media entre 20% e 30%, con moi boa drenaxe. A edafoloxía do solo é complexa e combina rochas metamórficas e rochas básicas (afloran xistos verdes, rochas ultrabásicas, serpentinitas e diques de cuarzo). O clima no val de Camanzo é oceánico, húmido e morno (a media de choiva é de 1.375 l/m2 e unha temperatura media anual de 13,5 graos, con 2.400 horas de sol anuais). Todos estes condicionantes do terroir fan que os viños da Adega Catrobrey teñan a súa propia personalidade e que se caractericen pola súa mineralidade e, sobre todo, por unha acidez moi equilibrada. Viños e augardentes O emblema da adega é o Sinpalabras Castrobrey (Albariño procedente das cepas máis vellas) e na súa etiqueta está representada “a máquina de escribir do avó, onde facía as primeiras facturas da adega, e empezou a escribir a historia da adega hai xa case 40 anos). A colección Sinpalabras está composta por viños procedentes desas “cepas vellas” pero van variando os tipos de elaboracións e crianzas. —Sinpalabras edición especial: este viño só aparece en anadas especiais. Por agora foron a 2010 (esgotado), 2013 (actualmente no mercado) e a 2018 (sairá no ano 2025) xa que se deixa aproximadamente cinco anos en aceiro inoxidábel e o resto en botella antes de saír ao mercado. —Sinpalabras barrica: aquí faise unha crianza en barricas de carballo francés usado durante seis meses. —Sinpalabras mosto flor 2018: aquí mantense o viño durante 10 horas a 10 grados de temperatura na criomaceradora e por gravidade, gota a gota, sen prensar, van caendo 2.000 litros que se vinificaron por separado. É a esencia desas cepas vellas. —Sinpalabras raspón 2018: por primeira vez, nunha anada marabillosa, conseguiuse a maduración perfecta do raspón do acio e prensouse o acio enteiro, sacando de 4.000 kg de uva 1.000 litros que se vinificaron por separado. —Sinpalabras ánfora: trátase de pequenas crianzas en dúas ánforas de barro, unha de 200 litros e outra de 300 litros durante catro meses. —Nice to meet you Castrobrey: É unha homenaxe á avoa da familia. A primeira anada foi a de 2012 e actualmente está no mercado a anada Asturias, onde saen as tres xeracións e que se representa nas tres variedades: Albariño, Treixadura e Godello... un coupage que cada ano cambia a cor e a cidade á que se dedica. Un viño do que están moi orgullosos na adega porque o perfil do viño e o deseño atrevido fai que a media de idade que o consome sexa nova. Tamén están os tintos Caíño distinto Castrobrey e o rosado fóra de DO Distinta Castrobrey. Só 1.000 litros de cepas de máis de 50 anos. A adega está orgullosa da comarca do Deza, terra de augardenteiros. Cos seus dous alambiques fan os seu Bocabajo Castrobrey... caña, herbas e café.