A UDC reclama Medicina ante a aposta da Xunta pola privatización do ensino universitario
A reunión entre os reitores das tres universidades públicas e os conselleiros de Educación e Sanidade rematou sen un achegamento de posturas. Mentres a Universidade da Coruña reclama os estudos de Medicina, a Universidade de Santiago de Compostela, a de Vigo e a Xunta da Galiza apostan por manter o actual mapa de titulacións. Neste contexto, o centro privado promovido por Abanca avanza na súa idea de incorporar á oferta o grao de Enfermaría no curso 2026/2027.
O Consello de Docencia Clínica convocado onte en Compostela pola Consellaría de Educación serviu para reafirmar os puntos de partida do Goberno galego e das tres universidades públicas. No marco da mesma, o reitor, coruñés Ricardo Cao, mantivo a súa proposta de ofertar a titulación de Medicina na Universidade da Coruña (UDC) para o curso 2027/2028, en liña coa decisión adoptada polo Consello de Goberno do centro.
"Nós dialogaremos até a extenuación e manteremos a proposta, que non é deste reitor nin deste equipo de goberno, senón da comunidade universitaria da Coruña", asegurou Cao, quen destacou que a alternativa formulada é "froito dunha profunda reflexión por parte do hospital e do Consello de Goberno da Universidade da Coruña". Actualmente, a UDC xa ofrece os graos de Enfermaría, Fisioterapia, Terapia Ocupacional, Podoloxía e Logopedia.
A proposta achegada pola UDC foi rexeitada polos responsábeis da Xunta da Galiza e polos reitores de Compostela e Vigo, que apostaron por manter o acordo sobre a docencia de Medicina alcanzado en 2015.O titular de educación, Román Rodríguez, afirmou que "é necesario que as decisións que se adopten neste ámbito poidan partir dun consenso, dunha visión conxunta de país e non de forma unilateral". Nuns termos semellantes, expresouse o conselleiro de Sanidade, Antonio Gómez Caamaño.
"Non hai dúbida ningunha de que na cidade da Coruña vai haber unha titulación de medicina", salientou Cao, a "única dúbida" é "se vai ser impartida por unha universidade pública ou privada". O reitor engadiu que "esa dúbida, nós, como universidade pública, non queremos tela" e alertou sobre o modo en que se outorgan os graos aos centros privados.
A aposta de Abanca
A proposta da UDC chega tras facerse pública a decisión da Universidade Intercontinental da Empresa (UIE), ligada á entidade financeira Abanca, de ampliar a súa oferta de titulacións e prestar o grao de Enfermaría no curso 2026/2027. Na mesma liña, os responsábeis do centro privado apostan por ofertar en vindeiras anualidades os estudos de Biomedicina ou Fisioterapia Médica e Deportiva. De feito, asinaron un acordo coa empresa HM Hospitales para desenvolver nas súas instalacións a oferta da formación práctica.
A posta en marcha dun grao de Enfermaría pola universidade de Abanca elevaría a nove os centros de ensino superior que ofertan esta titulación. Neste sentido, a proposta entra en colisión co disposto artigo 8 da Lei 6/2013, do Sistema Universitario da Galiza (SUG), que chama a evitar reiteracións de estudos. Tamén contraviría o artigo 13 da referida norma, en canto condiciona a creación de novas universidades a que o seu catálogo de titulacións sexa complementario e non reiterativo a respecto das existentes e consolidadas.
A alcaldesa da Coruña mostra o seu "apoio total" á titulación
A proposta da Universidade da Coruña (UDC) de ofertar a titulación de Medicina para o curso 2027/2028 foi onte defendida polo alcaldesa coruñesa Inés Rei, quen manifestou o "apoio total" á iniciativa. Pola súa parte, o presidente galego, Alfonso Rueda, entrou no fondo do debate, rexeitando as críticas de privatización do sistema universitario galego lanzadas desde a comunidade académica nos últimos días. A este respecto, indicou que na "Galiza existe agora mesmo, ao contrario do que existe na maioría das comunidades autónomas -onde existen varias universidades privadas-, só unha universidade privada".
A CIG-Ensino sinalou que "a máxima responsabilidade na situación actual é do presidente da Xunta e do seu conselleiro de Educación. Todo parte da decisión de regalarlle unha licenza universitaria aos Escotet, abrindo a porta á privatización do sistema universitario galego". Nesta orientación, indicou que "o momento actual non ten nada a ver co pacto de 2015" e defendeu que "diante da aposta decidida da Xunta por privatizar o SUG e as novas sobre as intencións da universidade vinculada a Abanca requírese de respostas contundentes de apoio ás universidades públicas". O sindicato tamén reclamou "unidade e entendemento entre as tres institucións públicas".
