Dous dos 15 tripulantes do Nuevo San Juan, pesqueiro con base en Burela (A Mariña) que o pasado domingo sufriu un incendio en augas do Gran Sol, xa regresaron á casa. Agora espérase que todos volvan entre esta terza e a cuarta feira, en función dos voos dispoñíbeis.
Así veñen de notificalo diferentes fontes próximas á armadora citadas pola axencia Europa Press, unhas fontes que inciden en que os tripulantes están en bo estado após o sinistro. Os 15 tripulantes do pesqueiro do Nuevo San Juan, rescatados o pasado domingo polo Novo Confurco, con base en Vigo, chegaron ao porto irlandés de Castletownbere contra as 8.30 horas da segunda feira.
Á súa chegada a porto púñanse ao dispor das autoridades para relatar o sucedido e o patrón realizaba a coñecida como protesta de mar, a manifestación formal do ocorrido en caso de sinistro.
O incendio no buque
Salvamento Marítimo recibiu un aviso do Nuevo San Juan pouco despois das 7 horas do pasado domingo no seu centro de Fisterra por un incendio a bordo mentres faneaba en augas do Gran Sol, en zona SAR británica. Con esta información, Salvamento informou o seu homólogo no Reino Unido, que desviou a varios buques á zona.
Sobre as 7.45h efectuouse o rescate polo Novo Confurco, que evacuou todas as persoas en bo estado a bordo de dúas balsas salvavidas. Na tarde da segunda feira o barco aínda continuaba ardendo á deriva, controlado por autoridades francesas.
O Nuevo San Juan é un palangreiro de fondo que está activo desde maio de 1999 e pertence ao censo unificado da frota de NEAFC, realiza a súa actividade en augas do Gran Sol e de Francia, no golfo de Biscaia, e está dedicado especialmente ás capturas de pescada de pincho. Ten 31,5 metros de eslora.