Un total de 186 centros escolares fecharon as súas portas na Galiza desde o ano 2009

A Xunta da Galiza fechou 186 centros educativos desde 2009. Segundo os datos achegados polo Instituto Galego de Estatística (IGE), no curso 2022/2023, Galiza contaba con 1.361 centros de réxime xeral en funcionamento, sendo 79% de titularidade pública e 21% de carácter privado. A maior parte dos primeiros, concretamente 95,4% do total, sitúanse nos niveis de primaria e infantil, concentrándose os segundos naqueles que imparten conxuntamente educación primaria, Educación Secundaria Obrigatoria (ESO) e ensinanzas postobrigatorias, até representar 87,7% dos mesmos. Familias denuncian que lles queren cobrar o arranxo de portátiles usados no ensino público polo alumnado A situación presenta importantes diferenzas co curso 2008/2009. Naquela altura, estaban operativos nos diferentes niveis educativos non universitarios 1.547 centros escolares, sendo 80,6% de natureza pública e 10,4% privados. Precisamente, a maior redución de prazas educativas nestes últimos 14 anos deuse no ensino público, sendo as comarcas coruñesas, onde a penetración da educación privada é máis elevada, onde se produciu o maior número de feches. A este respecto, a Consellaría de Educación recoñece que nese período fecháronse na circunscrición da Coruña 87 centros escolares, dos que só tres son privados. No que respecta á educación infantil, o número de centros caeu en 51,2% desde 2009. Mentres nesa anualidade contábase con 217 establecementos escolares para cursar eses estudos, a cifra ficou en 106 no curso 2022/2023, o que significa 111 centros menos. Neste caso, 100 dos centros fechados eran de titularidade pública, sendo 11 de carácter privado, o que significa que 90% do total dos centros de educación infantil que cesaron na súa actividade nese período pertencían á rede pública. Na mesma dirección, destaca a redución do número de colexios que impartían educación infantil e primaria, pasando nese período de 683 a 607, o que implica 76 centros menos, 75 dos cales facían parte do sistema público. As unidades educativas O descenso de centros escolares veu acompañado dunha caída nas unidades educativas. Neste sentido, enténdese por unidade educativa dun centro o grupo de alumnado que ten un mesmo titor e que cursa gran parte do seu horario lectivo conxuntamente. Así as cousas, lideran a caída as unidades en infantil, en primaria e en unidades mixtas infantil/primaria, rexistrando un descenso de 262 desde o curso 2008/2009. Centos de persoas protestan en Santiago contra a "deterioración clara" do ensino público e a "perda de presencialidade" Ademais, resulta, tamén, significativa a caída de unidades no bacharelato ordinario, con 156 menos, no bacharelato de adultos, ao suprimirse 89, e na ESO, coa perda de 257 unidades operativas. Nestes casos, os recortes seguen afectando de maneira case exclusiva aos centros de titularidade pública. As cifras achegadas pola Consellaría de Educación apuntan que a caída do número de unidades en funcionamento nos centros docentes atende aos distintos graos de urbanización onde se asentan e á propia realidade demográfica. Así, as zonas densamente poboadas contan cun total de 5.027 unidades en funcionamento, as denominadas zonas intermedias, con 6.060 unidades, en tanto que o ámbito rural, onde as zonas se denominan pouco poboadas, rexistran 3.505 unidades. Precisamente, son estas áreas onde máis se perciben os axustes aplicados polo Goberno galego. O secretario nacional da CIG, a primeira organización sindical do ensino, Suso Bermello, expón, en conversa con Nós Diario, que “non se pode afirmar que hai que evitar o despoboamento e dotar de servizos a todas as zonas do país e ao mesmo restarlle servizos a certas zonas e fechar escolas no rural”. Nesta lóxica, Bermello sinala que “os únicos centros que están en toda Galiza son os públicos, xa que os concertados só se asentan naqueles emprazamentos onde hai negocio, como son as cidades e algunhas vilas”. Bermello considera que o fechamento de centros educativos explica “como se enfronta desde a Xunta a atención ao ensino público”. Así, avanza que “en lugar de determinar unha baixada nas ratios ou que se desdobren aulas para mellorar a calidade educativa, o PP permite as máximos ratios e cando as cifras dan para eliminar unha aula ou unha escola, o PP elimínaa”. O gasto educativo Os recortes escolares na Galiza están ligados ao baixo investimento en educación. Segundo os datos publicados pola Autoridade Independente de Responsabilidade Fiscal (Airef), a Galiza atópase á cola do Estado en investimento educativo. As últimas cifras da Airef -referidas a 2021- indican que o gasto en educación por habitante na Galiza sitúase en 995 euros ao ano -60 euros por baixo da media do conxunto do Estado español, fixada en 1.055 euros-. Só Asturias, Madrid e Castela e León gastan menos que Galiza. O abandono escolar aumentou na Galiza en 20% e sitúase por riba da media europea A situación de 2021 non ofrece grandes novidades en relación coa última década. Así, o gasto educativo por habitante foi inferior en 40 euros á media do Estado en 2012, en 33 euros a 2013, en 38 euros a 2014, en 51 euros a 2015, en 36 euros a 2016, en 34 euros a 2017, en 48 euros a 2018, en 60 euros a 2019 e en 50 euros a 2020. Galiza sitúase á cola do Estado en investimento educativo Neste sentido, só en 2006, 2007 e 2008, co Goberno de coalición formado entre PSdeG e BNG, se produciron destacados incrementos no orzamento educativo, con alzas de 7,80% para o primeiro exercicio, de 8,50% para o segundo e de 8,46% para o terceiro. Os ensinantes perderon desde 2010 perto de 19% de poder adquisitivo A política educativa da Xunta da Galiza veuse caracterizando desde 2009 por axustes no sector público e por concesións ao sector privado. Así, nos últimos 14 anos, o sistema educativo sumou 140 concertos, pasando de 3.836 aulas en 2008 a 3.967 aulas no ano lectivo de 2022/2023. Ao tempo, téñense incrementado en 18% os fondos públicos destinados pola Consellaría de Educación a financiar o ensino privado. O ensino galego sumou 140 novos concertos desde o ano 2009 Por outra parte, o corpo docente rexistrou unha perda de poder adquisitivo desde 2010 de, aproximadamente, 18,64%. As traballadoras e traballadores públicos viron reducido o seu poder de compra en 2010, 2011, 2012, 2013, 2016, 2017 e 2021. Ao tempo, Galiza foi a única autonomía que non pactou a devolución das pagas extras retalladas entre 2011 e 2016, provocando, segundo a CIG-Ensino, "unha perda dunha media de 6.500 euros para cada docente". Ademais, os cadros de persoal dos centros de ensino presentan un envellecemento significativo, até o punto de seren os máis envellecidos do Estado. Segundo os datos achegados polo citado sindicato, 5.000 ensinantes xubilaranse nos próximos cinco anos, ao situarse máis de 7.753 ensinantes entre os 55 e os 65 anos, e 2.657 deles, na franxa de idade entre 60 e 65, colocándose así o corpo de mestres e as especialidades con máis docentes como o grupo máis numeroso. Entre os primeiros, destacan 1.316 mestres de Primaria, 488 de Infantil ou 249 de Inglés, destacando, entre os segundos, 500 ensinantes de Inglés, 477 de Lingua galega, 355 de Xeografía e Historia e 343 de Matemáticas.