Toma simbólica do Pazo de Meirás para reclamar a súa devolución ao pobo
Un grupo de “nacionalistas e demócratas” entraron esta mañá ao Pazo de Meirás e despregaron nunha das torres e na balconada dúas faixas con lemas en que se reclamaba a devolución do espazo ao pobo e coa lenda “franquismo nunca máis”.
Un grupo de persoas, entre quince e vinte, accederon pouco antes das once de esta mañá ao Pazo de Meirás para levar adiante unha ocupación simbólica do espazo e reclamar que sexa devolto ao pobo “para pór fin a oitenta anos desta ignominia”, segundo explicou desde o interior Néstor Rego, membro da Executiva Nacional do BNG, e unha das persoas, a maioría militantes nacionalistas, entre eles Bieito Lobeira e Rubén Cela, que entraron ao Pazo saltando un valado.
“Somos galegos, nacionalistas e demócratas e estamos aquí porque entendemos que as institucións públicas teñen que actuar para pór fin a fin a esta ignominia”, dixo Rego, antes de explicar que decidiran saltar o valado porque levaban quince días chamando para anotarse á visita de hoxe sen ter tido resposta.
“Imos estar aquí até que poidamos”, comentou Néstor Rego desde o interior do Pazo, “vimos un coche da Garda Civil, pero por aquí nin parece que haxa visitas nin ninguén máis”. Rego denunciou tamén “a continuidade entre o réxime franquista e o actual simbolizada nunha fotografía de Franco dándolle a man a Felipe de Borbón en 1975 neste mesmo pazo”.
“O PP non vai facer nada se non o empuxamos”
Desde o exterior, Luís Bará explicou que o BNG decidira convocar alí a militantes e manifestantes en canto lle comunicaron de que se ía emprender a acción de entrar no Pazo. “Son precisos actos como este, de rebelión, e actos desde as institucións como os que está levando adiante o BNG aquí e en Europa para facer que o PP mude, que o fará con desgana, e responda á demanda pública de recuperación do Pazo”, dixo o deputado en referencia as declaracións onte de Pedro Puy Fraga, portavoz parlamentar do PP, indicando unha vía, a dun acordo coa familia Franco, para a reintegración de Meirás ao patrimonio público.