A solvencia dalgunhas eólicas, en dúbida

Breoenergy é a división enerxética do Grupo Aljan, unha empresa catalá dedicada á xestión e administración de propiedades inmobiliarias. Actualmente está a tramitar na Galiza sete parques eólicos, a través de catro sociedades: Aventoa SL —Monte do Marco, en Monterroso e Palas de Rei—; Breotecnia SA —Prado Vello, en Chantada, Rodeiro e Taboada—; Galenergy SL —Feás, en Aranga e Coirós; Fontella, en Aranga e Oza-Cesuras; Maxal, en Antas de Ulla, Rodeiro e Taboada, e Seselle, en Oza-Cesuras—, e PE Coto das Gallas SL —un parque homónimo, en Fornelos de Montes—. O empresario Alfredo Núñez Chorén figura no Rexistro Mercantil como administrador único de Aljan SA, así como da empresa Breotecnia; á fronte de Aventoa e Galenergy, Alfredo e José Núñez García, mentres a sociedade PE Coto das Gallas está participada por este último e pola propia Galenergy. Estes tres nomes aparecen vencellados no Rexistro a sociedades que operan en diferentes sectores entre os que non se atopa o enerxético. Aliás, segundo consta na súa declaración patrimonial perante a Deputación de Lugo de 2019, o actual alcalde de Palas, Pablo Taboada, posúe 5% das accións de Breotecnia. Cómpre lembrar que a lei 5/2017, de fomento da implantación de iniciativas empresariais na Galiza, estabelece no seu artigo 30 as condicións que unha promotora de instalacións eléctricas debe cumprir para acreditar a súa capacidade técnica. Así, expón tres supostos: "Ter exercido a actividade de produción de enerxía eléctrica durante, cando menos, os últimos tres anos", "contar entre os seus accionistas cunha persoa socia que participe no capital social cunha porcentaxe igual ou superior a 25% e que poida acreditar a súa experiencia durante os últimos tres anos na actividade de produción de enerxía eléctrica" ou "subscribir un contrato de asistencia técnica por un período de tres anos cunha empresa que acredite experiencia na actividade de produción de enerxía eléctrica e que cumpra, á súa vez, con algún dos requisitos que se describen nos parágrafos anteriores". A Xunta nega información a 'Nós Diario' Dado que as empresas promotoras destes sete parques non cumpren as dúas primeiras condicións, Nós Diario realizou unha solicitude de acceso á información pública perante a Dirección Xeral de Planificación Enerxética e Recursos Naturais para coñecer o nome da sociedade coa que, en cumprimento da lexislación vixente, o grupo Breoenergy tería subscrito o citado contrato de asistencia técnica, e se esta tiña acreditada a súa experiencia nos últimos tres anos no sector enerxético. Porén, a petición foi resolta de forma negativa o pasado 5 de outubro, aceptando unha das catro alegacións presentadas polas sociedades implicadas. Na primeira delas, argumentan que este xornal non ten a "condición de interesado" na tramitación destes parques eólicos, algo que a Administración desbota lembrando que "o dereito á información corresponde a todas as persoas, independentemente da súa condición de interesada ou non". Nas dúas seguintes alegacións, as empresas afectadas esgrimen que a información solicitada "non pode considerarse como pública" ao tratarse dun contrato privado, unha cuestión tamén rexeitada polo Goberno galego ao abeiro da Lei de transparencia. O Goberno rexeitou a solicitude de información incumprindo os prazos fixados por lei A cuarta, por outra banda, refírese á aplicación dos límites de acceso a información pública previstos no artigo 14 da lei estatal de transparencia 19/2013, ao entender que a petición de transparencia podería supor un "prexuízo" para "os intereses económicos e comerciais" ou "o segredo profesional e a propiedade intelectual e industrial". A Administración escúdase neste aspecto para denegar a solicitude, a pesar de que esta non comprometía máis información que o nome da empresa que, con base na normativa actual, debe acreditar unha experiencia de tres anos no sector para poder tramitar parques eólicos. Tamén argumenta no seu escrito que "non se aprecia a existencia dun interese público ou privado que xustifique o acceso á información", rexeitando tamén o "acceso parcial" á mesma que contempla o artigo 16 da mesma lei. Aliás, cómpre salientar que a Xunta aceptou as alegacións presentadas por Aventoa SL case un mes fóra do prazo de quince días que, segundo a lei, teñen as sociedades afectadas para oporse a unha solicitude de transparencia desde que reciben a notificación por parte do Goberno galego. E, malia que a Lei 1/2016, de transparencia e bo goberno da Galiza, dá un mes á Administración para resolver as solicitudes de acceso á información pública —se ben o prazo se conxela cando se traslada a cuestión ás partes afectadas para alegaren—, esta non foi resolta até pasados 63 días tras a súa recepción na Dirección Xeral de Planificación Enerxética. A capacidade económica, en cuestión Segundo figura na documentación achegada polas empresas, o custo total destes sete parques roldaría os 200 millóns de euros. O maior desembolso —167 millóns— corresponde aos proxectos de Galenergy; porén, cómpre salientar que esta PEME (Pequena e Mediana Empresa) rexistrou un resultado negativo nos balances de situación de 2019 e 2020, aos que tivo acceso Nós Diario. Aliás, Galenergy afirma non ter persoal asalariado, nin fixo nin temporal, e declara un patrimonio neto negativo moi inferior ao capital social da mesma —4.000—, malia que Breotecnia está constituída como SA e o seu capital é de 60.200 euros. Galenergy carece de experiencia no sector e precisaría dunha sociedade avalista O Real Decreto Lexislativo 1/2010, polo que se aproba o texto refundido da Lei de sociedades de capital, estabelece no seu artigo 363 que unha sociedade deberá disolverse "por perdas que deixen reducido o patrimonio neto a unha contía inferior á metade do capital social, agás se este aumenta na medida suficiente". Por outra banda, no apartado "socios" do portal web da Asociación Eólica da Galiza (EGA) figura como "persoa de contacto" de Galenergy Vicente Cerezo Carbonell, un empresario valenciano que exerce desde 2010 como administrador único de Renotec Energy SL —con sede en València—, polo que, malia que a Xunta rexeitou aclarar que sociedade avala os proxectos do grupo Breoenergy, pódese presupor que se trata de Renotec. Con todo, após solicitar información perante o Rexistro Mercantil de València, este xornal puido constatar que Renotec Energy non publicou na última década ningún depósito de contas que acredite a súa solvencia económica ou a súa actividade no sector enerxético nos últimos tres anos, requisitos fundamentais para a tramitación de parques eólicos. "Falta de información" en Chantada O pasado mes de setembro, o Goberno local de Chantada instara a veciñanza a "non asinar" con Galenergy ningún contrato relacionado coa liña de evacuación do parque eólico Maxal, xa que a veciñanza afectada recibira propostas da empresa a pesar de que o Concello "non era coñecedor" do proxecto. Porén, Galenergy afirmou que todas as persoas implicadas recibiran "toda a información" sobre a liña eléctrica "de forma personalizada e sen ocultismo". Aliás, veciñanza de Aranga denunciou en maio neste xornal que non tivo constancia dos parques proxectados no Monte do Gato —Feás, Fontella e Seselle— "até que comezaron tramitarse a través da Consellaría".