Setembro, o mes da colleita

Setembro supón a recta final do verán e o comezo do outono e xa o di o noso refraneiro: "No setembro, colleita e non sementes". Este mes, sen ningunha dúbida, é unha época de gran variedade onde os nosos froiteiros énchense dunha infinidade de cores para que poidamos gozar das froitas máis ricas do ano: o verde das peras, mazás e uvas, o vermello das framboesas, amorodos e tomates, o morado das amoras e arandos... E xa que temos tanta variedade sería unha mágoa non aproveitarmos a oportunidade de gozarmos destes manxares todo o ano. Por iso, a seguir, preséntanse unha serie de alternativas para conservamos os produtos da horta e dispoñermos deles cando quixermos. Unha vez que probas a salsa de tomate caseira, non vas querer a do supermercado. Nunha primeira ollada pode parecer moi laborioso facela, mais o esforzo merece a pena. Simplemente temos que botar nunha pota os tomates cortados en anacos e deixarmos que se fagan a lume baixo até se converteren en salsa. Podemos engadirlle un rustrido de cebola para facela máis doce ou de vos gustar o picante, un chile tamén será benvido. E para termos salsa todo o ano, só cómpre envasala ao baleiro fervendo os botes dúas veces durante 20 minutos ao baño maría, a primeira para esterilizalos e a segunda para conseguirmos o efecto baleiro. Agora que xa sabemos envasar ao baleiro, podemos preparar marmelada de arandos, framboesas, amorodos bravos ou amoras das silveiras dos nosos bosques e fragas. O único que hai que facer é cocermos as bagas cun pouco de azucre para sacarlle o acedume durante uns 45 minutos e xa teremos a nosa marmelada lista para unhas torradas ou para acompañar unha torta de mazá. E falando de mazás, seguro que no mes de setembro escoitastes iso de "ao seu tempo veñen as uvas e as mazás maduras". Concordaredes comigo en que a vendima ben merece un artigo para ela soa, mais conservar as mazás para que cheguen até o Nadal non é unha tarefa difícil. Antes era típico gardalas entre o centeo ou facerlle unha cama con herba seca e gardalas na adega ou no faiado. Hoxe podemos substituír a palla por follas de xornal e se as gardamos nun sitio escuro onde circule o aire, poderemos ter mazás até ben entrado o inverno e así poder cociñarmos biscoitos, empanadas ou doces coas mazás da casa. E facéndolle caso á nosa cultura popular lembrade que "en setembro non hai vella que non trema" porque "se queres mel, por San Miguel", "por Santa Tegra abala a nogueira" e "polo San Mateo vendima a reo". Sexa como for, setembro está para comermos a lingua!