Sermos convértese no primeiro dixital galego en superar as 50 mil persoas seguidoras nas redes
27.947 en Facebook (líder absoluto entre os dixitais nativos galegos) e 22.067 en Twitter. Total: 50.014. A cifra mostra o crecimento sostido deste diario dixital.
Sermos é o primeiro dos diarios nativos dixitais galegos (por nativo enténdese aquel xornal que naceu on line e que non é unha réplica dun meio impreso) que ultrapasa a fronteira das 50 mil persoas seguidoras. Faino sendo o líder absoluto en Facebook (por diante de GaliciaConfidencial) e segundo en Twitter (por detrás de Praza). A progresión deste diario debuxa desde o principio unha liña claramente ascendente, tendo en conta que é o máis novo dos tres principais dixitais galegos: apareceu on line en abril de 2012, meses despois de Praza e 9 anos após de GaliciaConfidencial.
50.014. Ese é o número de persoas amigas de Sermos nas redes. En Facebook son un total de 27.947, cifra que o sitúa por diante de GaliciaConfidencial (27.791) e Praza (18.589). En Twitter este diario ten 22.067 followers, en tanto que a Praza o seguen 23.335 e a GaliciaConfidencial 21.718.
No cómputo global —na suma de Facebook e Twiter—, Sermos é o líder nas redes con 50.014 seguidoras, con GaliciaConfidencial na segunda praza (49.509) e Praza na terceira (41.924).
O salto cara adiante nas redes non deixa de ser unha manifestación do crecimento sostido da audiencia deste diario. Destarte, no que vai de ano 2018, e segundo os dados de Google Analytics, Sermos experimentou un aumento de 24,4 por cento das visitas, até alcanzar as 1,3 millóns. Tamén houbo un incremento moi significativo, 18,1 por cento, no que atinxe ao número de usuarias e usuarios únicos, ao totalizar 449.798, fronte as 380.719 do mesmo período de 2017.