O Sergas ordena derivar ao PAC de Vigo urxencias e atencións domiciliarias que corresponderían a centros de saúde
Rueda reduce estas medidas a "puntuais" e sinala que o verán é época de "especial tensión" porque os médicos teñen "dereito a descansar".
A Xerencia da área Sanitaria de Vigo ordena que as urxencias e atencións domiciliarias da quenda de tarde que corresponderían nalgúns centros de saúde durante o verán sexan derivados ao Punto de Atención Continuada (PAC) da cidade olívica.
Así figura en varios correos electrónicos que foron enviados pola Dirección de Atención Primaria da área Sanitaria, desvelados pola Cadena Ser, con medidas ante a ausencia de varios facultativos dos ambulatorios.
En concreto, xa desde o pasado 30 de xuño e até o próximo 15 de xullo, as atencións domiciliarias da tarde e as urxencias das quendas da mañá do centro de saúde de Beiramar deberán ser derivadas ao PAC, aínda que poderán ser atendidas polos facultativos dispoñíbeis no centro "en caso de emerxencia vital".
O mesmo ocorre coas urxencias e os domicilios do centro de saúde Pintor Colmeiro que xurdan en horario de tarde, aínda que neste caso as derivacións serán en días puntuais: 4, 9, 10, 11, 14, 15, 16, 17, 18, 23, 24, 30 e 31 de xullo.
Outras medidas
De igual modo, xa antes do inicio do verán, a Xerencia informou de que varios centros de saúde da área de Vigo concentrarían na quenda de mañá o servizo de Pediatría durante varias semanas. Esta medida afecta ao de Tui (O Baixo Miño) e a outros cinco da cidade olívica: Rosalía, Coia, Pintor Colmeiro, Nicolás Peña e Cuba.
Tamén ante a previsíbel falta de médicos e o aumento da demanda asistencial en zonas costeiras, o xerente da área de Vigo, Javier Puente, emitiu unha nota interna na que indicaba que aqueles pacientes desprazados temporalmente do seu domicilio habitual debían solicitar cita ordinaria no seu ambulatorio, "tendo en conta que nos últimos tempos a consulta telefónica é unha realidade en todos os centros de saúde".
Ademais, esta mesma nota sinalaba que os pacientes de concellos limítrofes que demanden unha consulta no municipio ao que se desprazan durante a época estival "serán derivados ao seu centro de referencia". Todo iso co obxectivo de "evitar a sobrecarga asistencial" dos ambulatorios de municipios en zonas de costa ou de "interese vacacional".
O verán, momento de "especial tensión"
Preguntado por estas cuestións na rolda de prensa posterior á reunión do Goberno galego desta segunda feira, o presidente, Alfonso Rueda, sinalou que o verán é un momento de "especial tensión" porque os profesionais collen vacacións, "tamén teñen dereito a descansar".
Recoñece que "hai zonas onde se produce unha maior afluencia de doentes", pero defende o plan de continxencia posto en marcha desde o Sergas, dotado con máis de 12 millóns de euros, máis aló de "circunstancias puntuais".
Así, apela á "tranquilidade" porque garante que vai haber "cobertura". "Fóra de que se poida estar a producir un problema puntual, iso descoñézoo", afirma.
