O Sergas fechará máis de medio milleiro de camas este verán

O Servizo Galego de Saúde defende que este verán estarán operativas na Galiza 89,5% das camas hospitalarias, "máis de 14 puntos por riba da ocupación real de anos anteriores". O Sergas fundamenta esta afirmación na experiencia do ano previo á pandemia. En 2019, os recursos operativos durante os meses de estío alcanzaron 88,5% de todos os dispoñíbeis, mentres que a taxa real de ocupación foi de 75,91%. Desta maneira, o Sergas xustifica o feche de camas que as xerencias das distintas áreas sanitarias foron confirmando nos últimos días ás organizacións sindicais de cada zona. Asegura que estarán operativos "todos os recursos necesarios para a asistencia sanitaria tendo en conta o decrecemento da demanda asistencial" que se produce no verán. Con todo, diferenza camas operativas de camas dispoñíbeis para matizar que malia a clausura de máis de 10% das camas hospitalarias, todas estarán dispoñíbeis de acordo coas necesidades das pacientes, de forma que se poderán empregar sempre que "así se requira". Galiza fechou 2019 cun total de 8.906 camas hospitalarias en funcionamento, 1.000 menos das que contaba hai dez anos, en 2009, sumando os recursos propios dos hospitais públicos e as camas utilizábeis da sanidade privada. Naquela altura, segundo os datos reunidos polo Instituto Galego de Estatística, os hospitais xerais do Servizo Galego de Saúde tiñan en funcionamento 6.571 camas en funcionamento e algo máis de 7.200 instaladas que, nalgúns casos, a pandemia da Covid-19 obrigou a poñer en marcha. Así, de acordo con estas cifras e coas estimacións de Sanidade, o Sergas fechará entre o 1 de xullo e o 30 de setembro deste ano unha de cada dez camas dos hospitais públicos, arredor de 600 postos segundo confirman a Nós Diario distintas fontes sindicais. Máis de 600 fechamentos As contas das organización sindicais responden ás previsións que lles foron trasladando as xerencias sanitarias nas últimas xornadas. A de Vigo confirmou a clausura dun total de 135 camas, 12,6% das 1090 prazas dispoñíbeis entre o hospital meixoeiro e o Álvaro Cunqueiro. En concreto, neste último centro suprimiranse 75 camas, 35 de neurociruxía e o resto, segundas prazas dos cuartos hospitalarios. No Meixoeiro prescindirán de 60 prazas, repartidas entre medicina interna e traumatoloxía. A estas, advirten os sindicatos, habería que sumar outras 120 camas que permanecen fechadas desde antes da chegada do coronavirus. O plan de adecuación de recursos asistencias previsto polo Sergas contempla, ademais, a supresión de 131 camas na Área da Coruña e Cee, 128 na de Lugo, A Mariña e Monforte e 36 na de Ferrol. A xerencia de Pontevedra e O Salnés informou do fechamento dun total de 90 camas: 78 en Pontevedra e 12 no Salnés, xustificado pola coincidencia das vacacións para a maioría do persoal e a diminución dos ingresos hospitalarios por procesos respiratorios. Mentres, a área de Santiago e O Barbanza calcula a eliminación temporal doutras 90 camas cirurxía xeral, trauma e lactantes no hospital de Conxo e no Clínico, onde tamén está previsto o inicio das obras de acondicionamento da UCI, que obrigará a buscar unha nova localización para os pacientes críticos. A área de Ourense, Verín e Valdeorras é a única que non avanzou cifra ningunha. "Non tería sentido", apuntan desde a CIG-Saúde, "xa que seguimos con pacientes en tres plantas do materno sen actividade antes da pandemia". Porén, desde CCOO, non pasan por alto o feche do 4º andar do Hospital de Cristal que afectou, no mes de abril, a 22 camas e 25 postos de traballo. Reducir as listas de espera As centrais sindicais concordan no "sen sentido" desta práctica que se repite ano tras ano. Máis despois dunha pandemia que veu aumentar de forma notábel a carga asistencial e as listas de espera. "Non é verdade que a demanda asistencial diminúa. Existe e é estrutural. A proba está nas listas de agarda que divulga o propio e que obvian as cifras da espera non estrutural. Polo tanto, non é que non haxa demanda, é que nin a planifican nin a programan", explica a Nós Diario a secretaria nacional da CIG-Saúde, María Xosé Abuín. "E mentres fechan a actividade cirúrxica e as camas, derivan diñeiro á privada para alixeirar as listas de espera", censura, sen dar conta dos desvíos que fan aos centros concertados. Para a CIG-Saúde, o Sergas incorre nunha dobre contradición ao dicir que non hai demanda mentres divulga os tempos e as persoas en agarda e ao presumir do maior número de contratacións da historia e sinalar a falta de persoal para afrontar o período de vacacións. Neste sentido, desde CCOO, reclaman planificación e reforzo dos cadros de persoal para atender a demanda asistencial real. "Necesitamos todas as camas e quirófanos funcionando mañá e tarde", exclama Marisol López, voceira da federación de Sanidade do sindicato. "O problema é que hai unha lista de espera enorme que compromete a calidade de vida das persoas", máis aló das cirurxías urxentes, entre a vida e a morte. López defende o dereito do persoal sanitario a gozar das súas vacacións no verán. Pero urxe planificación, ao igual que Javier Martínez, responsábel de Sanidade de UXT. "O Sergas ten que prever as vacacións do persoal, estruturalas e planificar un reforzo do persoal para aproveitar estes meses e reducir as listas de espera, máis despois da Covid e da sobrecarga asistencial acumulada. Pero fai como se non pasase nada, o de sempre, unha política de recorte de gasto que non aclara a onde vai parar", conclúe.