O Sergas convoca máis de 33.000 menores para unha vacinación extraordinaria contra a gripe

A Consellaría de Sanidade activará esta fin de semana unha convocatoria extraordinaria para inmunizar contra a gripe, no marco da campaña actual, máis de 33.000 crianzas galegas de entre 6 meses e 11 anos nos 14 hospitais públicos do país.

Así o anunciou esta cuarta feira o conselleiro de Sanidade, Antonio Gómez Caamaño, durante un acto oficial en Pontevedra. Segundo detallou os hospitais comarcais administrarán as vacinas a sexta feira, de 16.00 a 20.00 horas. O resto de centros hospitalarios ofrecerán o mesmo horario a sexta feira e ampliarán a campaña ao sábado, con dúas quendas: de 10.00 a 14.00 horas e de 16.00 a 20.00 horas. Na área sanitaria de Pontevedra e O Salnés están citados 2.100 menores.

O conselleiro instou as familias a participar nesta convocatoria extraordinaria, subliñando que a vacinación é "a mellor protección fronte á gripe". Ademais, lembrou que Galiza ten activado desde mediados de novembro o Plan de Inverno, deseñado para anticipar e xestionar os incrementos de demanda asistencial propios da tempada gripal.

Gómez Caamaño reiterou o seu chamamento á cidadanía para que se vacine tanto fronte á gripe como fronte á covid. Até o momento, 720.000 persoas recibiron a vacina antigripal, máis de 67% delas maiores de 65 anos. Tamén se inmunizou perto de 60% do persoal sanitario e case 47% dos menores de até 11 anos.

Desde o inicio da campaña notificáronse máis de 1.050 ingresos hospitalarios relacionados coa gripe, maioritariamente de tipo A. Para conter estes datos, o Sergas realizou a pasada fin de semana unha campaña extraordinaria dirixida a persoas de entre 60 e 69 anos, á que acudiron 6.500 persoas, elevando a cobertura en maiores de 60 anos até case 57%.

Caamaño recalcou que "a Atención primaria é importante durante todo o ano, pero adquire especial relevancia neste período de inverno", pola maior incidencia que existe de infeccións respiratorias que "sobrecargan estes servizos".