A plataforma ofreceu o pasado sábado unha comparecencia de prensa en que se referiu ás “graves consecuencias” da reapertura. A empresa mineira, Atalaya Mining -con sede en Chipre e participada por fondos de investimento e compañías suízas e chinesas-, admitiu que, a maiores dos lodos contaminados, produciranse toneladas de materiais estériles “potencialmente xeradores de drenaxe ácida con capacidade de mobilización de metais pesados”.
Os colectivos arousanos tamén alertan do perigo que estes vertidos pode supor para a auga potable de 155.000 persoas, as que habitan concellos río abaixo da mina: Vedra, Boqueixón, Teo, Padrón, Dodro, Rianxo, Boiro, Pobra do Caramiñal, Ribeira, Pontecesures, Valga, Catoira e Vilagarcía de Arousa.
Xaquín Rubido, portavoz da Plataforma en Defensa da Ría de Arousa, avanzou o sábado que “presionarán” para que esta reapertura “non se leve adiante”. Lembrou as mobilizacións que frearon a Lei de Acuicultura da Xunta de Feijóo a pasada lexislatura e afirmou que “o modus operandi” resultará semellante. Polo momento, a plataforma xa enviou cartas aos responsábeis das consellarías de Mar, Medio Ambiente e Industria para solicitar encontros e coñecer as intencións da Administración.
“En poucas palabras: o cobre e os cartos lévannos eles”, conclúe a folla informativa, “e a merda quédanos para toda a vida”. Concellos como o de Rianxo ou o de Vilagarcía de Arousa aprobaron mocións contra a reapertura da explotación de cobre en Touro.