A Sareb conta con 1.830 inmóbeis baleiros en toda Galiza preparados para habitar

A Sociedade de Xestión de Activos Procedentes da Reestruturación Bancaria (Sareb) é titular de 6.512 inmóbeis na Galiza. Segundo se recolle na paxina web da entidade, a mercantil propiedade do Estado conta con 1.678 garaxes e trasteiros, 511 baixos comerciais, 1.241 vivendas actualmente en execución e 1.252 solos, a metade de natureza urbana e, por conseguinte, útiles para a súa transformación nun uso residencial. Ademais, é titular de 1.830 vivendas listas para habitar distribuídas por toda a xeografía galega. Neste sentido, as comarcas coruñesas contan con 1.206 pisos, as pontevedresas con 445, a demarcación luguesa con 136 e a ourensá con 48. A maiores, a sociedade pública posúe 663 vivendas en construción e 400 solos na circunscrición da Coruña, 296 vivendas en construción e 293 solos en Pontevedra, 136 vivendas en construción e 72 solos en Lugo e 4 vivendas en construción e 487 solos en Ourense. Unha parte significativa destes inmóbeis emprázanse nas localidades de máis presión urbanística. Así, a Sareb rexistra na cidade da Coruña 86 vivendas rematadas e 235 en construción, sumando na súa área metropolitana outros 247 pisos e 413 en obra. Ao tempo, dispón en Vigo de 61 vivendas rematadas e 53 en construción, declarando en Pontevedra 6 pisos acabados e solos para erguer 25 edificios. Ademais, conta en Lugo con 7 vivendas listas para habitar e 34 solos de carácter residencial, alcanzando en Ourense 4 pisos e 22 terreos. A decisión do Goberno do Estado de colocar no mercado inmobiliario en réxime de aluguer as vivendas propiedade da Sareb responde ao obxectivo de reducir o custo dos inmóbeis. A medida, que esta terza feira aproba o Consello de Ministras e Ministros, fora reclamada ao Executivo de Pedro Sánchez polos socios da investidura desde o comezo da lexislatura, mais a súa aplicación adiouse até este momento, cando os socialistas precisaron dos apoios dos seus socios parlamentarios para sacar adiante a Lei da vivenda. Por outra parte, en setembro de 2022, o Parlamento acordou por unanimidade, froito dunha proposta do BNG, solicitar a transferencia dos activos de uso residencial da Sareb á Xunta da Galiza, sen que, de momento, se cumprise. Só 144 vivendas protexidas para aluguer construídas na Galiza na última década O prezo da vivenda A alza do prezo da vivenda en propiedade ou aluguer foi moi importante nestes últimos anos. A este respecto, o Observatorio da Vivenda da Galiza do Instituto Galego da Vivenda e Solo (IGVS) da Xunta da Galiza avanza que entre xaneiro de 2018 e xaneiro de 2023, o custo do aluguer aumentou de media no país 20,82%. Pola súa parte, para estes últimos cinco anos o portal inmobiliario Fotocasa rexistrou unha alza de 24,4%. Precisamente, o Índice Inmobiliario Fotocasa informaba onte que o primeiro trimestre do ano fechou cun incremento trimestral do prezo do aluguer do 2% e un crecemento interanual de 6%. Os incrementos son moito máis elevados nas sete cidades e nas súas áreas metropolitanas, así como naquelas zonas con maior presión turística. 10.940 persoas agardan por unha vivenda protexida en aluguer. O prezo da vivenda en propiedade medrou nos últimos dous anos na Galiza por riba da media do Estado. Neste sentido, a principal sociedade estatal de taxación, Tinsa, sinala que en 2021 e 2022 o custo dos pisos encareceu en 17,6%, só rexistrado cifras máis elevadas Euskadi, con 21,3%, e Illes Balears, con 18,3% Nesta dirección, sitúanse os datos da práctica totalidade dos portais inmobiliarios. A suba do valor dos inmóbeis viuse favorecida pola ausencia dunhas políticas públicas por parte das administracións que promovesen a construción de vivenda protexida. Entre 2014 e 2023 erguéronse 144 pisos protexidos en réxime de aluguer, unha cifra moi por baixo do número de solicitantes. Neste sentido, o Rexistro de demandantes de vivenda da Xunta ten inscritas máis de 12.000 persoas, das cales case 11.000 —en concreto, 10.940— eran solicitantes dunha vivenda protexida para aluguer. Os pisos turísticos multiplican por seis a vivenda para aluguer dispoñíbel na Galiza Aluguer turístico Os pisos turísticos aumentaron en máis de 3.000% en 5 anos. O incremento das vivendas de uso turístico está empuxando para arriba o valor dos alugueres e reducindo a oferta inmobiliaria. Tanto é así que naquelas localidades máis turísticas o arrendamento limítase con cada vez máis frecuencia ao período estival, dificultando o acceso ao aluguer de longa duración. As vivendas dedicadas a unha finalidade turística incrementáronse en máis de 3.000% en seis anos. Segundo os datos do Goberno galego, en 2017 estaban rexistradas 542 vivendas turísticas, chegando na actualidade a perto de 16.500, que ofertan arredor de 80.000 prazas residenciais. A presión deste tipo de inmóbeis déixase notar ao longo de todo o país, cunha especial incidencia nas áreas urbanas e naqueles concellos do litoral con máis actividade turística. A suba dos prezos da vivenda e a ausencia de vivendas para alugar contrasta co elevado número de inmóbeis baleiros. Segundo un informe elaborado pola Federación Galega de Empresas Inmobiliarias (Fegeim), a Galiza é o territorio do Estado coa maior porcentaxe de casas e pisos desocupados, até sumar 330.000 inmóbeis baleiros para un parque de 1,6 millóns de vivendas rexistradas, o que significa 20,6% do parque total. A porcentaxe é cinco puntos superior á media estatal, que se sitúa en 13,7%. A cifra máis elevada de vivendas desocupadas concéntrase nos núcleos de poboación de menos de 20.000 habitantes. Que implica a nova lei de Vivenda? 80% das vivendas da Sareb proceden dos activos das caixas de aforros A Sociedade de Xestión de Activos Procedentes da Reestruturación Bancaria (Sareb) fundouse en novembro de 2012 por esixencias do plan de rescate europeo para asistir e recapitalizar os bancos do Estado español. A súa constitución respondeu a un esquema de 45% de capital público e 55% de capital privado, "nun exercicio forzado de arquitectura contábel para evitar que as achegas do Estado computen como débeda pública", en palabras da Comisión de Investigación da Crise Financeira do Congreso dos Deputados. As propiedades da Sareb proceden dos activos tóxicos existentes no balance das entidades de crédito rescatadas durante a crise desatada tras 2008. Practicamente, 80% dos mesmos na Galiza facían parte da carteira de Caixa Galicia e Caixanova, cuxa entidade resultante tras a fusión recibiu máis de 9.400 millóns de euros de fondos públicos e viuse liberada destas propiedades que lastraban as súas contas. A día de hoxe, o Estado só ten recuperado do rescate das caixas galegas 738 millóns de euros, tendo recibido Abanca desde 2013 do Fondo de Reestruturación Ordenada Bancaria (FROB) 462 millóns de euros. O economista Carlos Sánchez Mato considera que "a creación da Sareb foi unha estratexia para atrasar o recoñecemento das perdas das entidades afectadas pola crise". Nesta liña, afirma que "traspasáronse inmóbeis e préstamos dos bancos crebados á Sareb, pero cos prezos inflados, en 17.000 millóns de euros, segundo sinalou a Comisión Europea. Isto foi unha maneira de reducir o prezo do rescate". A Xunta anuncia 1.800 vivendas para aluguer social até 2026 e hai 10.900 demandantes