A sanidade pública retoma as mobilizacións: manifestación o 26 e folga en Atención Primaria a finais de novembro

Como en febreiro, abril e xuño pasados, como cada outono desde xa non se sabe cantos anos, a sanidade pública galega, que sofre a corrosión silenciosa dos retallos e da privatización, volve a rúa para dar outra voz de alarma. Desta volta son as profesionais de Atención Primaria as que toman a iniciativa. Empezan esta quinta feira, con paros de 5 minutos diante dos centros de saúde. 

Reclaman recuperar a estrutura do servizo en cada área: a Xerencia de Atención Primaria. E póñenlle de novo prazo ao cumprimento da súa reivindicación: tres meses. Tal é a urxencia. O servizo está tan deteriorado que non caben máis concesións. Reclaman ademais limitar as citas diarias a 30 para mellorar o tempo de atención ás pacientes; que se convoquen todas as prazas vacantes; que se dea cobertura a todas as ausencias; e unha atención homoxénea en todas as áreas (acceso ás probas diagnósticas, teleconsulta, acortar tempos de respostas, entre outras cuestións); e un aumento orzamentario para este servizo respecto do total do gasto até 25%.

As asembleas de área destas últimas semanas decidiron ademais convocar unha folga para os días 27 e 28 de novembro, cando xa se teñan coñecido as recomendacións do comité técnico que Sanidade puxo en marcha para avaliar os problemas na Atención Primaria. Antes, o 26 de outubro, está prevista unha manifestación en Compostela cun chamamento “a participar a todos os colectivos profesionais e á poboación”. 

A mobilización, convocada pola Asemblea de Área Sanitarias, confía en contar co apoio dos sindicatos, “que están nas mesas técnicas que montou a Consellería de Sanidade e din que esperarán a ver se hai resultados”, explica Ramón Veras, médico de Primaria na Coruña e un dos portavoces do colectivo.

O persoal de Primaria tamén anuncia a creación dun Foro Galego de Atención Primaria.