Sanidade insta a poboación a "autoconfinarse"

O Goberno galego incrementa as medidas de prevención ante o aumento de casos de coronavirus rexistrado no país tralas festas de Nadal. Con todo, as restricións aprobadas son menos duras que as que puxo sobre a mesa a Consellaría de Sanidade ao longo desta semana. O presidente galego, Alberto Núñez Feixoo, descartaba a primeira hora da mañá un novo confinamento na Galiza, decisión pola que optaron nas últimas datas algúns países da Unión Europea, alegando que "non é necesario dende o punto de vista epidemiolóxico". Así mesmo, após a reunión mantida polo comité clínico na tarde desta sexta feira, desbotouse a proposta de limitar a mobilidade nas áreas máis afectadas por franxas de idade. Pese a isto, o conselleiro de Sanidade, Julio García Comesaña, instou ás galegas e galegos a "autoconfinarse" e unicamente abandonar o domicilio por "cuestións esenciais", ao tempo que pediu limitar o contacto con persoas non conviventes para "tratar de frear esta dispersión do virus" que se está a producir nas últimas datas. "Canto máis tempo fiquen na casa, mellor para eles e para a sociedade", apuntou tamén o presidente Núñez Feixoo. "Debemos limitar as saídas do domicilio para tratar de frear esta dispersión do virus que se produciu dende o Nadal", apuntou García Comesaña A respecto da mobilidade exterior, a Xunta decidiu estender até o 31 de xaneiro o feche na fronteira co norte de Portugal, que nas últimas datas aumentou considerabelmente a incidencia do virus: "Preocúpannos especialmente os enclaves de Verín e Tui", explicou García Comesaña. O conselleiro salientou tamén que, durante o período natalicio, rexistráronse 2.513 sancións polo incumprimento das limitacións na Galiza. "A meirande parte das galegas actuou con responsabilidade e agradecemos o seu esforzo, mais un número importante non o fixo e agora vemos as consecuencias", apuntou, e expresou a súa preocupación pola "redución da percepción da gravidade" de contraer a enfermidade por parte dun sector da sociedade. "A pandemia aínda non rematou, debemos estar todas alerta", engadiu. Compostela, A Coruña e Ourense As principais restricións afectarán ao sector hostaleiro. A capital galega pasa ao nivel 'extremo' de alerta, xunto cos municipios limítrofes de Ames e Teo, por mor dun crecemento constante dos positivos que o conselleiro catalogou como "moi preocupante". Hoxe a incidencia acumulada a 14 días por cada 100.000 habitantes é de 292, superando a media da Galiza (248) e moi perto da cifra que rexistra o conxunto do Estado (294). En consecuencia, redúcese a hora de feche da hostalaría ás 18.00 horas, prohíbese a atención no interior dos locais e limítase o aforo nas terrazas a 50%, e cada mesa poderá ser ocupada por até catro persoas (conviventes ou non). A situación tamén se agravou nos últimos días nas áreas da Coruña, cuxa incidencia a 14 días é de 257, e Ourense, con 217. Ambos os dous pasan ao nivel 'medio alto' de risco xunto aos concellos cos que comparten o feche perimetral (Arteixo, Cambre e Culleredo coa Coruña e Barbadás con Ourense). Nestes municipios os locais hostaleiros tamén pecharán de agora en adiante ás 18.00 horas e verán reducido o seu aforo no interior (30%), mentres no exterior manterase ao 50% En calquera caso, só poderán compartir mesa catro persoas (igual que no caso de Compostela, conviventes ou non). Con todo, García Comesaña non descartou a aplicación de maiores restricións ao sector hostaleiro non só nestes concellos, senón tamén nas vilas e cidades que hoxe teñen unha incidencia menor: "Todas as semanas valoramos as medidas en base a diferentes criterios e a vindeira terza feira poderían ampliarse estas limitacións", aclarou. "Blindar" as residencias Até o remate da campaña de vacinación, as visitas a residencias de maiores quedan limitadas a unha por semana, e sempre a mesma persoa. As usuarias tampouco poderán saír dos centros neste tempo. "Queremos blindar as residencias mentres non estean todas as residentes e traballadoras vacinadas", sinalou o conselleiro. A respecto desta cuestión, estimou que a primeira quenda de vacinación (unha dose) nos centros sociosanitarios rematará a vindeira semana, e o 18 de xaneiro daría comezo a administración da segunda dose. "Agardamos rematar esta primeira campaña a finais deste mes", matizou. Todas as medidas adoptadas pola Xunta entraron en vigor esta madrugada. Seis posíbeis casos da variante británica Por outra banda, Sanidade informou de que se están a estudar seis positivos como posíbeis casos da nova cepa do coronavirus xurdida no Reino Unido. Un deles podería estar vencellado co surto que se produciu no Monbus Obradoiro. Até o de agora foron confirmados oito casos desta variante na Galiza, seis na Mariña e os outros dous en Compostela e Vigo.