Sabes de onde eran os primeiros galegos e as primeiras galegas? A Uvigo dá a resposta
Un estudo presentado esta cuarta feira polo arqueólogo da Universidade de Vigo Eduardo Méndez estabeleceu a orixe das primeiras persoas que habitaron na Galiza.
Así, Méndez afirma que os primeiros e as primeiras poboadoras do país viviron no xacemento paleolítico das Gándaras de Budiño, no Porriño (comarca de Vigo), hai uns 310.000 anos. Os resultados da datación confirman a antigüidade do xacemento,sendo desta maneira o punto con presenza humana máis antigo do país.
A investigación foi realizada polo equipo liderado por Eduardo Méndez Quintas e Manuel Santonja, do Centro Nacional de Investigación sobre a Evolución Humana. As Gándaras de Budiño foi o primeiro enclave da época paleolítica en ser identificado e escavado na Galiza. Inicialmente datábase nuns 25.000-15.000 anos de antigüidade.
"Isto levou a unha idea de que no noroeste da Península Ibérica existía un Paleolítico atípico e anacrónico con respecto ao que ocorría no resto do suroeste de Europa", explicou Méndez Quintas, o cal, ao seu xuízo, "supuña un argumento para defender a idea do atraso secular da Galiza". De aí a relevancia da investigación, que resolve estes erros na cronoloxía e desmenten esta falsa crenza, segundo reivindica nun comunicado o Concello do Porriño.
Importancia internacional
"Os resultados deste estudo son de vital importancia a nivel nacional e internacional, xa que non só cambian o coñecemento que temos sobre a historia do Porriño, senón que reescriben a Prehistoria de Galicia", apuntou o rexedor da localidade, Alejandro Lourenzo.
Os traballos desenvolvidos na última campaña constituíron na realización dunha escavación nunha área de 30 metros cadrados, que complementaban á campaña de sondaxes arqueolóxicas desenvolvidas durante 2018. Estes traballos permitiron obter "valiosa información" sobre as condicións de formación dos depósitos xeolóxicos e, sobre todo, das densas acumulacións de ferramentas líticas que se atopan no lugar.
Os resultados confirman o que os arqueólogos sospeitaban: os niveis máis antigos do xacemento teñen máis de 310.000 anos de antigüidade. Pola súa banda, os niveis máis recentes teñen entre 25.000 e 55.000 anos.
"Podemos dicir que as Gándaras de Budiño teñen o xacemento con presenza humana máis antigo de Galiza", engadiu Méndez, polo que os resultados da investigación serán publicados nunha revista científica.
