Adentrámonos na Adega Pedralonga

N o ano 1979 Francisco Alfonso Reboreda (Lantaño, Portas, 1940) volta da emigración co obxectivo de facer o que se viña facendo de sempre na súa familia: traballar no campo e na viticultura. Xeracións da familia, instaladas no Val do Umia, colleitaron coidadosamente as viñas e elaboraron viños segundo se pode ver en escritos de comezo do Século XX. No retorno, e coa idea de dar continuidade á tradición familiar nunha maior explotación, Reboreda adquire unha parcela de seis hectáreas en Godos, Caldas de Reis, na que se plantan catro hectáreas de albariño no ano 1980. As súas arelas de respecto á tradición e á calidade están xa na base: esta parcela obtivo o número 3 de viticultor no rexistro da Denominación de Orixe Rías Baixas. Viticultura responsábel Nun terreo elevado que recibe influencias do clima atlántico, aos pés do monte Xiabre e cunha compoñente francoareosa, tívose desde un principio a premisa de desenvolver unha viticultura respectuosa co medio ambiente e co solo, e apostouse por una condución en espadeira a prol da calidade en detrimento da cantidade. Este sistema, conxuntamente cunha orientación norte-sur, permite unha mellor ventilación e maior aproveitamento do sol para as uvas, acortando a incidencia, de por si endémica do mildio, e reducindo os tratamentos fitosanitarios. Para crear una boa estrutura non hai laboreos, e a cuberta de herba é permanente potenciando na primavera herbas como a serradela e a veza, especies simbióticas que fixan nitróxeno na terra e fan mulching natural no verán. Técnicas biodinámicas, que teñen en conta as fases lunares e respectan o medio ambiente para que finalmente a calidade da terra sexa quen impregne a uva de sabor e aroma. A vendima manual, a ausencia de pesticidas e abonos minerais, permiten que os viños leven a personalidade única das pequenas adegas que se esforzan por controlar cada detalle en cada un dos procesos. Unha filosofía que aposta pola calidade e a elaboración de viños con personalidade propia, sen estándares. Os viños No ano 1997, aparece a marca Pedralonga Albariño nos mercados. Un viño elaborado seguindo a tradición familiar onde todo tipo de intervención química sobre os viños está vetada nesta adega. A principal premisa é o uso de lévedos autóctonos con preparación do pé de cuba con uvas seleccionadas. A fermentación maloláctica completa e ausencia de filtrados son dúas prácticas irrenunciábeis tamén. Como resultados obtense un viño cunha personalidade moi marcada e unha mineralidade do chan granítico onde afonda as súas raíces as cepas. Posteriormente xa se incorporou o viño tinto que "sempre houbo na casa" coas uvas Mencía, Caíño tinto e Espadeiro. Este é un tinto moi "Salnés", fresco e afroitado con gradación alcohólica moderada. Con estas dúas referencias xa implantadas pouco a pouco fóronse aportando novas elaboracións (madeira, lías, Caíño branco) coas que se completa o catálogo, pero sempre respectando a filosofía. Na actualidade a familia Pedralonga conta con distintas referencias en viños brancos e tintos. Os brancos —Pedralonga. Un viño branco sen crianza, monovarietal Albariño (100%), elaborado coas uvas obtidas de cepas de máis de 30 anos de idade. —Pedralonga Terra de Godos. Un viño branco sen crianza, monovarietal Albariño (100%). —Pedralonga Barrica. Un viño branco con crianza en barrica de carballo francés. monovarietal Albariño (100%), elaborado coas uvas obtidas de cepas de máis de 30 anos de idade. —Pedralonga Vendetta. Un viño branco con crianza sobre lías en inox. Monovarietal Albariño (100%), elaborado coas uvas obtidas de cepas de máis de 30 anos de idade. —Pedralonga Carolina. Viño branco xove e que é monovarietal de Caíño Branco (100%). Os tintos —Pedralonga do Umia. Viño tinto en que se mesturan equilibradamente: Mencía (60%), Caíño Tinto (30%) e Espadeiro (10%). —Pedralonga do Umia Barrica. Viño tinto criado en barrica, con: Mencía (60%), Caíño Tinto (30%) e Espadeiro (10%). Hoxe en día os viños de Adega Pedralonga teñen una boa implantación a nivel internacional, podendo atoparse en máis de 10 países tanto de Europa, Asia e América con excelentes representacións en cartas de reputados restaurantes e tendas especializadas.