Un silo implosiona no porto de Guixar e provoca unha vertedura de aceite de palma na ría de Vigo
Dous traballadores resultaron feridos ao seren alcanzados pola implosión.
Unha gran mancha de aceite de palma cobre na tarde desta quinta feira as augas da ría de Vigo, á altura do porto de Guixar. Segundo recolle Radio Vigo, detrás desta vertedura estaría a implosión nun dos silos situados no peirao de contedores.
Aínda que se descoñecen as causas do incidente, a elevada presión no interior podería ter provocado a rotura do depósito, de varios metros de altura e situado perto da rotonda de Sanjurjo Badía. A vertedura deixou unha mancha amarela de varias decenas de metros.
O accidente produciuse ás 15.20 horas desta quinta feira, deixando dous traballadores feridos, un deles de gravidade. Algunhas fontes sinalan que sería trasladado en ambulancia de soporte avanzado ao Hospital Povisa con varias roturas nas costelas e nunha perna.
A Autoridade Portuaria xa estaría traballando na colocación dunha barreira antiverteduras para conter a mancha, a cal considera como "unha substancia non contaminante". A lancha auxiliar do buque María de Maetzu, pertencente a Salvamento Marítimo, desprazouse ao lugar para conter a mancha. Máis tarde desprazouse a Salvamar Mirach, para colaborar nas tarefas de protección da costa. Tamén participan no operativo o buque de Gardacostas Valentín Paz Andrade e o remolcador Helechosa.
Ao lugar desprazáronse ambulancias e patrullas da Policía española, que investiga o acontecido como un accidente laboral. O 112 Galiza tamén alertou a Garda Civil e a Policía local.
