A ministra de Sanidade, Mónica García, avanzou esta quinta feira que o seu departamento está a estudar a posibilidade de que o preservativo estea cuberto por parte do Sistema Nacional de Saúde, sendo gratuíto "para aquelas franxas de idade novas con menor poder adquisitivo e que presenta uns incrementos importantes nas taxas de infeccións de transmisión sexual (ITS)".
"Non ten sentido que se cubra unha vacina para evitar unha infección, pero non un método barreira como o preservativo", proclamou García, durante a súa comparecencia ante a Comisión de Sanidade no Senado. Así as cousas, para mellorar a prevención das ITS, Sanidade traballará tamén na actualización da Estratexia de Saúde Sexual e Reprodutiva, "para que a educación sexual sexa un eixo central que aborde todas estas cuestións non desde o medo ou a culpa".
"A saúde sexual é unha fonte de benestar para todo o mundo e necesitamos que a poboación reciba unha educación baseada na información, a honestidade, o consentimento e o coidado nas relacións interpersoais", dixo, engadindo que, quen non entendan isto, "é porque habitan nun pasado onde a sexualidade era un tabú e a culpa era a norma".
Neste punto, lembrou o "preocupante incremento" nas cifras de ITS, lembrando os últimos datos ao respecto. "Tras a falsa sensación que nos achegou o descenso nas taxas de incidencia durante o ano 2020 por mor da pandemia, no 2022 confirmouse a tendencia ascendente que observamos desde o ano 2016. Este incremento afecta principalmente adultos novos de entre 20 e 44 anos, sendo máis rechamante nos homes entre 20-34 anos no caso da sífilis e a gonorrea, e nas mulleres no caso da chlamydia", detallou.
Neste sentido, García tamén chamou a "mellorar o acceso a centros especializados no manexo destas infeccións" que sexan capaces de incorporar a última innovación e que dispoñan non só do coñecemento da patoloxía concreta, senón de como abordar estas cuestións "sen culpabilizar as persoas". "A culpa nunca foi unha política de saúde pública efectiva", expresou a ministra, en consonancia coa vontade do seu departamento de "loitar contra o estigma".
Nova enquisa de saúde sexual
Mónica García tamén chamou a "adaptarse ao século XXI" no relacionado con estas infeccións, polo que anunciou a elaboración dunha nova Enquisa Nacional de Saúde Sexual. "Ante o incremento nas ITS dos últimos anos, non podemos acudir a datos do 2009, de cando data a última enquisa dispoñíbel", explicou.
Aliás, defendeu a necesidade de "incorporar a innovación" en materia de ITS ao SNS. "Necesitamos ampliar o acceso por parte dos profesionais sanitarios a test rápidos para as diferentes ITS para acelerar os tempos de diagnóstico, mellorando así a prevención", asegurou García, para agregar que se deben incluír as "autotomas como forma de que as persoas poidan participar no diagnóstico se teñen sospeitas de estar expostas a unha ITS".
