O Constitucional admite o recurso do Goberno estatal contra a normativa eólica da Xunta
Queda suspendida a vixencia e aplicación dos cambios legais desde a data de interposición do recurso.
O pleno do Tribunal Constitucional (TC) admitiu a trámite o recurso de inconstitucionalidade promovido polo Goberno estatal contra os cambios legais que, a través da lei de medidas fiscais e administrativas que acompañou os Orzamentos de 2024, introducía a Xunta da Galiza para normativa eólica, incluída a repotenciación, e tamén en materia de dependencia.
O Tribunal, tras invocar o Goberno estatal o artigo 161.2 da Constitución, suspendeu a vixencia e aplicación dos devanditos apartados desde a data de interposición do recurso (30 de setembro de 2025) para as partes do proceso e desde o día en que apareza publicada a suspensión no Boletín Oficial do Estado (BOE) para os terceiros.
O Goberno estatal, lembrou o TC, argumentou o recurso de inconstitucionalidade en base a que os artigos impugnados poderían vulnerar as competencias exclusivas do Estado sobre bases e coordinación da planificación xeral da actividade económica, autorización de instalacións eléctricas e transporte de enerxía e réxime mineiro e enerxético.
En concreto, os puntos cuestionados polo Executivo que dirixe Pedro Sánchez son os equivalentes á nova regulación eólica galega (artigo 30 da lei de medidas), incluída a obrigación de repotenciar que fixaba a Xunta no último cambio acometido.
O Goberno estatal tamén manifestou dúbidas da legalidade do punto relativo a vincular o grao de dependencia e de discapacidade, unha vía que a Xunta defende que activou para tratar de axilizar que as axudas chegasen aos destinatarios correspondentes (artigo 45).
Dúbidas no eólico
O Goberno estatal explicou cando formalizou o recurso que as impugnacións relativas ao artigo 30 fundaméntanse na súa "incompatibilidade" coas regulacións estatais existentes en relación co sector eléctrico e, singularmente, en materia de enerxía eólica.
Entre outros argumentos expostos no seu día, para o Goberno estatal, a previsión galegaga relativa á repotenciación de parques eólicos "adoece de inconstitucionalidade", en canto "obriga a substituír un número determinado de xeradores eólicos por outros de maior potencia e menor número, co que regula a chamada repotenciación á marxe da normativa básica estatal.
Agregaba que, baixo o termo repotenciación de parques eólicos, "está a facerse referencia non necesariamente a un incremento na potencia instalada nos parques eólicos existentes, senón á substitución de aeroxeradores autorizados para a súa redución e diminución, coa consecuente modificación dos termos da autorización outorgada e o investimento realizado con base na normativa aplicábel".
Aliás, o Goberno estatal incidía en que ao disporse que "a repotenciación non poderá dar lugar ao incremento da potencia autorizada e ao limitar o inicio das obras, impedindo que se produza antes de dezaoito meses, contravéñense as bases do sector eléctrico, con previsións normativas que chocan co dereito estatal".
En relación cos apartados 19, 20, 21 e 25 do artigo 30, o Goberno estatal cuestiona que a Xunta pretende estabelecer a aplicación directa dunha Directiva europea que habilita entre outras previsións aos Estados á eliminación da avaliación de impacto ambiental en determinados supostos sen que o Estado, previamente e de acordo coas súas competencias na materia, fixase a normativa básica para o efecto.
Artigo ligado á dependencia
Mentres, o recurso polo artigo 45 baseábase, para o Executivo estatal, "na invasión das competencias estatais en materia de regulación das condicións básicas que garantan a igualdade de todos os españois no exercicio dos dereitos e no cumprimento dos deberes constitucionais".
En concreto, a interpretación xurídica do Goberno estatal neste caso, é que a Xunta pretendía "entrar a regular cunha perspectiva simplificadora" a discapacidade e a dependencia no réxime económico destas dúas materias "correspondendo ao Estado a competencia normativa sobre o réxime económico" de ambas.
A Xunta xa incidira en que, á marxe da discrepancia legal, este paso en paralelo (o de acceder a unha porcentaxe de discapacidade determinado ao ter concedido un grao de dependencia) terá efectos na recadación fiscal estatal, por mor das deducións fiscais que corresponderían a quen vexa recoñecida esa discapacidade.
