A proposta de Intervento é a escollida para a iluminación da Catedral de Santiago apostando pola “mínima intervención”
O anteproxecto Hermes obtivo un 95 de 100 na puntuación.
A aposta pola "mínima intervención" do estudo de arquitectura Intervento foi a proposta gañadora do concurso posto en marcha para iluminar a contorna monumental da Catedral de Santiago, no que a Praza de Praterías exercerá como escenario da obra piloto antes da futura implantación progresiva no resto do conxunto.
O xurado internacional acordou por unanimidade seleccionar o anteproxecto Hermes -cunha puntuación de 95 sobre 100 puntos, fronte aos 65 das outras finalistas- ao considerar que posúe "claridade e integridade" e evita a "homoxeneización" da paisaxe nocturna coa "xerarquización" da iluminación, que utiliza "gradientes e contrastes".
Outro aspecto determinante, segundo recolle o Concello de Santiago -impulsor do certame público-, foi a estratexia de "mínima intervención" sobre o patrimonio. Desta maneira, esta é a única das propostas que resolve a iluminación sen situar novas instalacións sobre as cubertas de pedra, recentemente rehabilitadas na súa integridade.
A decisión foi adoptada o pasado 3 de febreiro, na que o xurado avaliou os tres anteproxectos de acordo cos criterios estabelecidos: valor e calidade do deseño lumínico; viabilidade técnica e económica, e protección do medio ambiente, eficiencia enerxética e innovación tecnolóxica. No primeiro ámbito, Hermes obtivo 45 de 50 puntos e nos restantes, a máxima puntuación -25 de 25-.
Desta maniera, Intervento, con ampla experiencia en iluminación ornamental, será o encargado de redactar o proxecto executivo e asumir a dirección facultativa da obra piloto na Praza das Praterías.
Esta actuación está concibida como banco de probas para a futura implantación progresiva no conxunto da contorna catedralicia, que inclúe ás prazas do Obradoiro, Quintana e Inmaculada.
Aforro enerxético de 68%
No plano técnico e económico, o xurado valorou que é "tecnicamente moi completa". Tamén avaliou positivamente a utilización de luminarias de diferentes marcas comerciais, o que, ao seu xuízo, "favorece a sustentabilidade económica da proposta e mesmo o seu mantemento a longo prazo".
No ámbito ambiental, a proposta articúlase ao redor do criterio de "integración e mínima intervención", cun control preciso dos feixes de luz, destinado a "evitar cegamentos e reducir a contaminación lumínica", o que contribúe a preservar a escuridade desexada do firmamento e da paisaxe nocturna
O xurado enxalzou que o proxecto cuantifica un aforro enerxético aproximado de 68% respecto ao consumo actual e que se desenvolverá, ademais, en edificios que carecían até o de agora de iluminación ornamental.
