Unha Orde do 23 de marzo de 2020 recollida no Diario Oficial da Galiza, daba conta da limitación dos desprazamentos para atender cultivos de autoconsumo a 500 metros. A nomativa foi criticada por sindicatos agrarios e outros colectivos, que denunciaron este impedimento. Hoxe o DOG recolle unha modificación daquel artigo, ampliándo o radio dos traslados a todo o termo municipal onde se localice a vivenda habitual da produtora ou produtor.
En caso de que os cultivos se atopen noutro concello, os desprazamentos estarán limitados a cinco quilómetros como máximo. A maiores, para acreditar a necesidade de achegarse ás hortas, as produtoras deberán portar o carné de aplicador ou manipulador de produtos fitosanitarios ou a tarxeta de rexistro dispensada polo Consello Regulador da Denominación de Orixe no caso das viticultoras.
Desta volta, a Consellaría de Medio Rural engade a obligatoriedade de achegar unha declaración responsábel na que especifique os predios nos que se localizan os cultivos, a identificación das parcelas, os cultivos realizados e, no caso de cultivos ecolóxicos, unha especificación que aclara o non uso de tratamentos fitosanitarios, xustificando así a carencia do carné de manipulación destes tratamentos. Unha medida, esta última, reclamada tamén polas produtoras en ecolóxico nunha entrevista con Nós Diario.
No mesmo documento, a portadora deberá declarar que leva desprazándose aos predios en cuestión durante un período mínimo dun ano. Ao tempo, mantense a norma que impide a máis de dúas persoas traballar na mesma finca. Esas dúas produtoras deberán respectar as distancias de seguridade en todo momento, segundo especifica Medio Rural.