O primeiro bolseiro da Fundación Caixa Rural Galega Tomás Notario Vacas finaliza os seus estudos de posgrao

A Fundación Caixa Rural Galega Tomás Notario Vacas anunciou esta terza feira a "finalización exitosa" dos estudos de Alexandre Rico Fernández, o primeiro beneficiario do seu programa de bolsas de posgrao. Rico, graduado do Campus Terra da Universidade de Santiago de Compostela, completou o seu mestrado en Medicina Veterinaria Preventiva na Universidade de California-Davis.

"Grazas ao apoio económico e a confianza da Fundación, Alexandre puido desenvolver competencias clave en epidemioloxía, estatística aplicada, saúde pública e xestión do risco, baixo o enfoque One Health", afirman desde a fundación da entidade bancaria. "A súa experiencia nunha contorna académica e profesional innovadora permitiulle deseñar unha formación personalizada e adquirir habilidades esenciais para liderar proxectos con impacto na sociedade galega".

Na súa memoria final, Rico Fernández destaca a importancia da investigación e a formación especializada para enfrontar os "desafíos estruturais da Galiza", como o envellecemento, o despoboamento e a perda de competitividade en sectores chave como o agroalimentario. Con esta visión, Alexandre Rico planea regresar á Galiza para contribuír ao "desenvolvemento sostíbel" do país.

Rico Fernández visitou a sede da fundación recentemente para compartir os detalles da súa experiencia e a finalización dos seus estudos grazas á bolsa da que foi beneficiario. O seu testemuño ·reafirma o compromiso da Fundación co talento galego e a promoción do desenvolvemento económico, social e produtivo do medio rural·.

A Fundación Caixa Rural Galega Tomás Notario Vacas lembra que a convocatoria de bolsas de posgraduado para o curso 2025/2026 segue aberta todo o mes de maio. Estas bolsas están dirixidas a aqueles interesados en realizar un mestrado ou tese doutoral no estranxeiro.