A primeira liña de defensa: o lobo

Esta non é a primeira vez que se escribe sobre o lobo nin vai ser a última. Nesta ocasión, o motivo vén dado pola súa exclusión do marco xeral no que as especies protexidas se sitúan no estado, o LESRPE (Listado de Especies Silvestres en Régimen de Protección Especial), a través unha manobra quizais legal pero sucia. A artimaña ven dunha emenda dentro da lei de desperdicio alimentario, emenda que votou a dereita estatal (PP, VOX, Junts e PNV), pero non só, pois Bildu e ERC abstivéronse rompendo así a primeira liña de defensa que existe contra o fascismo (non só) no ámbito ambiental. A defensa da estulticia precisa de discursos estultos e así puidemos coñecer como na enferma mente do populismo ultra a xente ten medo de saír de casa para ir á farmacia ou á misa.... Trátase dunha burla á intelixencia, o sentido común e a ciencia, unha cesión ao populismo. Nun mundo globalizado, o mercado da carne compite por prezo nunha batalla que os pequenos gandeiros nunca van poder gañar nunha conxuntura como a actual no que o gando en extensivo ou semi extensivo simplemente sae pouco a conta. Que ultradeita e agrotrumpismo convenzan a unha parte da poboación de que o lobo é un problema amosa grandes debilidades sociais como falta de respecto pola realidade, a ciencia e a información veraz que son barreiras que nos protexen do fascismo e o populismo. A ciencia amosa que matar lobos non só non diminúe os ataques ao gando senón que os incrementa debido á destrución dos grupos Porén, non o ten tan doado a (ultra) dereita española. Que o lobo saia do LESRPE non significa que inmediatamente se poida cazar. A pelota está no tellado das comunidades autónomas e estas débense ater aos informes científicos sobre a situación da especie. A sentencia do Tribunal Superior de Xustiza da Unión Europea, a C-436/22, de xullo do ano pasado determina que para que unha especie se poida cazar debe estar nun estado de conservación favorable e no territorio español nin o está nin ten pinta de que o vaia a estar no futuro. Ademais, o Convenio de Berna segue a protexer o lobo a pesar de que a dereita conseguiu rebaixar o nivel nalgúns estados; España ten asinado este convenio, vai incumprilo como estivo facendo dende os 80 ata hai pouco? Matar o lobo Coñezamos algúns feitos: o lobo non ataca persoas en Europa, as probabilidades de que un gobernante de dereitas en traxe te mate por omisión, como en Valencia, ou por destruír a sanidade pública como en calquera comunidade do PP/VOX son infinitamente superiores ás probabilidades de que un lobo poida sequera mirar mal a un cidadán. Os lobos contribúen ao mantemento dos ecosistemas en bo estado, así, afórrannos millóns de euros alí onde viven grazas a que manteñen á raia á tuberculose bovina presente en reservorios de especies silvestres. Limitan poboacións doutras especies como os xabarís, non só por depredación directa senón por un mecanismo de ecoloxía espacial no que as presas son excluídas da paisaxe. A porcentaxe de gando afectado en Europa é anecdótica polo que simplemente pensar que poden supoñer unha ameaza a gandería vai en contra das matemáticas. As baixas no gando que efectivamente hai son consecuencia de prácticas profesionais deficientes pois os rabaños axeitadamente xestionados non teñen apenas problemas e, en calquera caso, un rabaño é un ben privado, non público como é o lobo. Como depredador apical que é, o lobo nunca vai ter sobrepoboación pois unha característica destes é que limitan a súa propia poboación. Os empresarios gandeiros reciben cartos grazas ao lobo por tres vías diferentes: Política Agraria Común (PAC), pago por danos e pago das medidas preventivas. Se o lobo se desprotexe estes pagos deberan decaer. Están acreditados comportamentos delitivos de gandeiros facendo pasar por ataque de lobo calquera morte de gando no monte, incluso propiciándoa. O lobo no só mata gando, tamén o pode carroñear. Quen si producen danos desmesurados son os cans: no Reino Unido prodúcense danos por valor de 2,5 millóns de Euros/ano debido á morte de 35.000 ovellas e años nun país sen lobos dende a Idade Media. Por outra banda, e isto é importante, a ciencia amosa que matar lobos non só non diminúe os ataques ao gando senón que os incrementa debido á destrución dos grupos. En definitiva, hoxe con populismo, ignorancia anticiencia, a normalización da mentira e o alarmismo desprotéxense o lobo, mañá poden ser o oso, o lince, as candorcas ou calquera cousa que a ultradereita se lle ocorra: minorías, colectivos vulnerables, eliminación de dereitos laborais, normas ambientais... Mentres, en Portugal, tres días despois da desprotección en España, o goberno aproba unha lei para blindar a súa protección. Aquí, o goberno dará a medida do seu compromiso presentando un recurso ante o Tribunal Constitucional E que podemos facer nós? Pois por exemplo apoiar o fondolobo.org porque a batalla vai ser, sobre todo, legal.