Un Avogado Xeral do Tribunal de Xustiza da Unión Europea, Michael Collins, considerou esta quinta feira que debe prevalecer a lei británica sobre a xurisdición española no caso que enfronta o Estado español coa aseguradora do Prestige, London P&I Club, o que na práctica suporía resolver o litixio cunha arbitraxe en Reino Unido ou Gales en base a salvagarda que liberarían a compañía de asumir o pago de compensacións.
As conclusións do Avogado Xeral non son vinculantes para o Tribunal de Xustiza da UE, malia que as sentenzas ditadas coinciden na meirande parte dos casos coa liña marcada por estes ditames. A cuestión perante o Tribunal de Xustiza da UE refírese ao conflito entre as sentenzas e non á validez ou non de ningunha delas.
Collins concluíu que o laudo arbitral ditado en 2013 no Reino Unido pode aplicarse para non recoñecer a sentenza ditada no Estado español, que obrigaba a aseguradora a desembolsar de 855 millóns de euros, xa que debía aplicarse ao contrato o dereito inglés.
No seu ditame, Collins indicou que o laudo arbitral debe considerarse unha "sentenza relevante" que fai que non se poida aplicar no Reino Unido a sentenza ditada noutro país e engade que o Estado español "debeu iniciar un procedemento de arbitraxe en Londres para reclamar o pago" a London P&I Club.
Aliás, Collins subliñou que España non podía apelar aos dereitos contractuais dos propietarios do buque sen cumprir a cláusula 'pay to be paid' incluída no contrato pola que a aseguradora só estaría obrigada a pagar a indemnización de 855 millóns de euros se foron abonados previamente polos propietarios da embarcación á aseguradora.
"Ao non efectuarse o pago previo por parte dos propietarios do buque da responsabilidade asegurada, o Club non era responsábel fronte ao Estado español", sinalou Collins, que considerou que "a responsabilidade do Club non excedía de 1.000 millóns de dólares estadounidenses".
O 16 de xaneiro de 2012, London P&I Club iniciou un procedemento no que solicitaba que se obrigase o Estado a presentar o seu recurso perante o Dereito inglés, dado que a demanda era contractual e respondía ás normas inglesas de conflito de leis.
A causa xudicial do Prestige
O caso parte do naufraxio do petroleiro Prestige, en novembro de 2002, fronte ás costas galegas cando transportaba 70.000 toneladas de fuelóleo, que se derramaron e causaron importantes danos no litoral.
Neste marco, iniciouse unha disputa xudicial entre a aseguradora do buque, London P&I Club, e o Estado español, exposta en dous procesos diferentes en dous estados membro —daquela o Reino Unido aínda non abandonara a UE—. Os devanditos procesos deron lugar a dúas resolucións xudiciais: unha ditada pola Audiencia Provincial da Coruña e outra polo Tribunal Superior de Xustiza de Inglaterra e Gales.
O Estado español solicitou o recoñecemento da sentenza da Audiencia Provincial da Coruña polos órganos xurisdiccionais de Inglaterra e Gales, cuestión á que o Tribunal Superior de Xustiza de Reino Unido accedeu en maio de 2019 e ante a que London P&I Club presentou recurso de apelación, polo que agora se expón a cuestión prexudicial ao Alto Tribunal europeo.