A presión hospitalaria impide aliviar as restricións

As medidas restritivas adoptadas o pasado 27 de xaneiro na Galiza están a traducirse nunha xeneralizada diminución dos contaxios que hoxe segue a ser insuficiente e inestábel. Así, esta cuarta feira detectáronse 708 novos positivos (126 máis que a xornada anterior), deixando un total de 17.632 doentes coa infección activa, unha cifra que si minguou nas últimas 24 horas (-820). Pola súa banda, a taxa de positividade das probas PCR e serolóxicas foi de 5,6%, ao tempo que a incidencia acumulada a 14 días, segundo os datos ofrecidos polo Sergas, diminuíu na última semana 23% até os 591 casos por cada 100.000 habitantes, máis do dobre do limiar de 250 que marca o "risco extremo". Após o encontro mantido na tarde da terza feira co Comité Clínico para facer balance da evolución da Covid, o conselleiro de Sanidade, Julio García Comesaña, valorou positivamente a "tendencia descendente" da curva de contaxios na última semana, mais advertiu que a situación é "francamente preocupante" nos hospitais, especialmente nas Unidades de Coidados Intensivos: "Nótase un descenso nos ingresos en planta que non se reflicte aínda nas UCI, os datos non son suficientes para falar aínda de contención desta terceira vaga", expuxo. Feixoo fala de desescalada e o conselleiro considérao "imprudente" Neste senso, considerou que é "moi cedo" para falar dun hipotético amolecemento das restricións, unha idea que cualificou de "pouco prudente" e "inoportuna" dadas as circunstancias: "Estamos moi lonxe do obxectivo porque moitos concellos teñen unha incidencia acumulada a 14 días superior a 250", sentenciou, facendo fincapé na necesidade de manter en vigor unhas medidas que "están a ser efectivas" pese a que aínda queda "moito traballo por diante". Deste modo, o responsábel da Sanidade galega contradixo a mensaxe que apenas unha hora antes transmitira no Parlamento o presidente da Xunta, Alberto Núñez Feixoo, quen apuntou como unha opción "posíbel" dar "algún respiro" nas restricións a vindeira semana. O mandatario anunciara a inminente posta en funcionamento dun plan de desescalada "medido e gradual", a fin de evitar dar "pasos en falso" na loita contra a Covid. Situación crítica nas UCI As hospitalizacións volveron descender esta cuarta feira en 63, mais aínda fican 975 persoas ingresadas en planta e outras 240 nas Unidades de Coidados Intensivos. García Comesaña afirmou que o alivio da presión sobre os centros sanitarios será "un camiño lento", xa que as camas UCI destinadas a doentes da Covid teñen actualmente unha ocupación de 87,6%. Galiza é hoxe o territorio do Estado cunha maior presión sobre as unidades de críticos, xa que a cuarta parte dos internamentos da última semana foron no país. O xerente do Sergas, José Flores, apuntou que a situación global é "estábel" segundo o concepto de "hospital único" que manexa Sanidade, isto é, a derivación de pacientes a outras áreas sanitarias cando a situación o requira. 18 persoas foron trasladadas do hospital de Ferrol ao de Lugo e outras dúas ao de Pontevedra, mais a cidade do Lérez tamén se viu obrigada na última semana a enviar a Vigo 13 doentes. A Consellaría mantén activos os "plans de continxencia" para vixiar a evolución da pandemia nos hospitais, que propón catro niveis de risco. Deste modo, a área da Coruña-Cee segue na fase 3, tanto en hospitalizacións convencionais (254 doentes) como nas unidades de críticos (80), ao igual que a de Ferrol (con 144 e 20 internamentos respectivamente). Galiza é o territorio do Estado con máis presión sobre as UCI Nunha situación semellante atópanse os hospitais de Pontevedra-O Salnés, que continúan na fase 3 nas UCI (20) e baixan á 2 en planta (109). En Ourense-Verín-O Barco, pola súa banda, actívase o terceiro nivel nos coidados intensivos (18) e mantén o segundo nos ingresos convencionais (148). A área de Compostela-O Barbanza tamén segue na fase 3 nas UCI (46), mais pasa á primeira en planta (119). En Lugo-A Mariña-Monforte e Vigo, pola contra, a situación é máis próspera: ambas as dúas manteñen a fase 1 nas hospitalizacións ordinarias (66 no primeiro caso e 135 no segundo) e soben á fase 2 na unidade de críticos (28 en cada área) por mor da derivación de pacientes doutros hospitais da Galiza. No tocante ás vítimas mortais da pandemia, Sanidade notificou 28 pasamentos esta cuarta feira, facendo un total de 2.016. Deste modo, a taxa de letalidade no mes de febreiro roldou 2,8%. Seis meses de espera pola vacina para menores de 55 A vacinación, xunto cos cribados poboacionais, é a "grande esperanza" da Xunta para facer fronte á pandemia. Esta semana Galiza recibiu 19.890 novas doses de Pfizer e as primeiras 11.100 de AstraZeneca, que serán administradas a partir de hoxe ao persoal do Servizo de Axuda ao Fogar (SAF) menor de 55 anos. Cómpre lembrar que o Ministerio de Sanidade decretou que esta última vacina non se poderá empregar en maiores de 55, malia o apuntado onte pola Organización Mundial da Saúde (OMS). Segundo os datos do Sergas, esta terza feira terían recibido a segunda dose todas as persoas usuarias e traballadoras das residencias e as e os profesionais sanitarios de primeira liña, ao tempo que a cuarta feira tería comezado a vacinación do resto de sanitarios. García Comesaña matizou que aínda non se decidiu a que grupos poboacionais se administrará a vacina após recibila o persoal do SAF. Por outra banda, o Ministerio anunciou a cuarta feira que as persoas menores de 55 anos que dean positivo en coronavirus terán que agardar seis meses para accederen á vacina, ao igual que as persoas que se infecten após recibiren a primeira dose. Preguntado a respecto da incidencia da cepa británica na Galiza, o conselleiro de Sanidade apuntou que, polo de agora, foron confirmados 41 casos, unha cifra condicionada pola pouca capacidade para secuenciar as mostras (36 por semana). "Prevemos un incremento de 1,5% semanal e precisamos medidas para atallalo", expuxo. O Comité Clínico intenta defenderse das críticas "A nosa cor [política] só ten un nome: son os nosos pacientes e os nosos profesionais", expuxo na rolda de prensa da mañá de onte o doutor Manuel Vázquez Lima, como resposta aos "comentarios escoitados estes días". Tamén o conselleiro quixo salientar o traballo "altruísta e voluntario" dun Comité que "traballa até as fins de semana". O coordinador das Urxencias Hospitalarias da área de Pontevedra-O Salnés facía referencia, deste modo, á información que Nós Diario desvelou o pasado 26 de xaneiro a respecto da composición do devandito Comité: 47% dos seus membros son altos cargos da Administración galega. 'Nós Diario' xa desvelara o carácter político e partidista do Comité Algúns deles cargan ás súas costas cun pasado controvertido, como é o caso do xerente da área ourensá, Félix Rubial, imputado en 2016 por adiar a distribución do medicamento para a hepatite C e responsábel directo do fechamento do paridoiro de Verín. Tamén está presente no Comité a curmá do presidente da Xunta, Eloína Núñez, quen o pasado ano, sendo xerente da área de Compostela, acusara ás e aos sanitarios de contraer a Covid nas salas de café, e non "polo seu traballo no hospital". Días despois de se publicar esta información, a Asociación Galega para a Defensa da Sanidade Pública apuntara que "falta persoal experto en pandemias" e que "20 de 26" membros "defenden intereses persoais".