Pratos fresquiños para o verán

Coa chegada da época estival o que menos nos apetece son comidas quentes ou moi pesadas. Para axudar a combater a calor, imos ver algunhas receitas refrescantes e sinxelas coas que gozar no verán. Cogombros Un dos alimentos estrela desta temporada son os cogombros, é un ingrediente imprescindíbel en pratos como o gazpacho ou tamén en ensaladas. Son perfectos para o verán, pois son moi refrescantes e teñen unha gran cantidade de auga, o que fai que nos axude a hidratarnos. Unha idea moi saborosa con esta hortaliza é unha crema fría de cogombro, coliflor e xenxibre. Esta crema faise triturando o cogombro co resto de ingredientes e acompáñase de coliflor cocida. Ten un sabor suave e moi fresco e un toque de picante que lle dá personalidade, está realmente deliciosa. Aínda que a crema fría está boísima, o máis común é comer o cogombro en ensaladas. En Grecia teñen unha ensalada moi famosa feita con cogombro, trátase da coñecida ensalada grega. Faise con olivas negras, tomates, cogombros, cebola e queixo feta, un dos máis famosos do país helénico. Cortamos todos os ingredientes en taquiños pequenos excepto a cebola que a cortamos en tiras e mesturamos todo coas olivas. Finalmente aderezámola con sal, aceite de oliva e un chorriño de limón por enriba. Podemos engadirlle un pouco de ourego seco picado tamén se queremos. Ensaladas No mundo de ensaladas case todo vale, podemos combinar os ingredientes dos que máis gostemos: pasta, atún, verduriñas, ovo cocido… Tamén é posíbel engadir ingredientes quentes como polo á prancha ou rebozado e fritido, incluso zamburiñas o que dá lugar ás ensaladas mornas. Un exemplo disto é a ensalada de ñoquis que vos traio. Os ñoquis son un tipo de pasta italiana, con forma de boliñas e que se fan a base de pataca cocida. Para facer esta receita precisamos cocer os ñoquis en auga, refogar os espárragos verdes cun chisco de allo nunha tixola e servímolos no prato mesturados con folliñas de eiruga, anchoas, tomatiños cereixa e un chisco de cebola. Regamos ben con aceite de oliva, botámoslle un chisco de sal e pementa moída e xa podemos deleitarnos con esta deliciosa ensalada morna cociñada en tan só uns minutos. Outra ensalada que podemos comer como entrante ou acompañante é a ensalada de pataca. É un prato moi famoso na Alemaña e leva cachelos, ceboliña, ceboliño e un mollo feito con iogur, maionesa, crema agre e mostaza, aínda que tamén hai versións nas que se lle bota salchichas, cogombriños ou ovos cocidos. Salpicón Na Galiza temos un prato ben famoso e moi refrescante que combina froitos do mar e da horta, o salpicón de marisco. No noso país estes produtos adoitan ser de gran calidade, o que é imprescindíbel para elaborar un bo salpicón. Os ingredientes básicos desta receita son os pementos verde e vermello e a cebola. Córtanse ben picadiños e réganse cunha boa vinagreta, a partir de aí podemos engadirlle os peixes e mariscos dos que máis gostemos. Eu adoito facelo con polbo, mexillóns e lagostinos, pero hai outros moi típicos como a centola ou o peixe sapo tamén. Doces e sobremesas Esta é unha das épocas do ano con máis variedade de froitas, comelas soas xa pode ser unha sobremesa perfecta. É o caso de cereixas, amorodos, pexegos… Os amorodos adoitamos comelos sós ou acompañados con nata batida ou iogur, pero tráiovos unha idea ben orixinal e sinxela para gozar deles. Amorodos con vinagre, si, con vinagre. Só precisamos lavalos e cortalos en anacos ou lascas, a continuación engadímoslles azucre por enriba e un chorriño pequeno de vinagre, preferiblemente de mazá ou de viño. Remexémolos ben e deixámolos repousar como mínimo unha hora na neveira. Pasado este tempo a combinación dos amorodos co azucre e o vinagre formará un almibre cun toque entre acedo e doce que resulta exquisito. Outra idea similar é facer os amorodos en anacos cun chisco de leite, azucre e canela. Se deixamos repousar un chisco a mestura coas froitas, soltaran o seu zume e daranlle cor ao leite. É unha sobremesa ou merenda moi sinxela e moi fresca. E para rematar non podemos esquecernos dos xeados, porque pensar en verán é case pensar en xeados. Temos unha gran variedade deles que podemos facer na casa. Os de iogur son dos máis sinxelos, pódense conxelar directamente os iogures tanto naturais como de sabores e incluso engadirlles anacos de froitas ou de chocolate. Podemos facelos tamén con zumes ou con batidos de leite e incluso engadir nata ou queixo. Desta vez recoméndovos un xeado de framboesa natural. Para elaboralo só precisamos nata, ovos, azucre e framboesas. Primeiramente trituramos as framboesas e coámolas para tirarlle as pebidas. Logo mesturamos os ovos, o azucre e un chisco de zume de limón ao baño maría. Finalmente batemos todo xunto até ter unha mestura homoxénea e gardamos no conxelador unhas doce horas até que se conxele de todo. Podemos retiralo do frío dez minutos antes de consumilo para que poidamos manipulalo máis facilmente. O seu sabor é tan impresionante que despois de probalo non quereredes voltar comprar xeados nunca máis.