Polo dereito a parir con dignidade
O anuncio do peche do paridoiro de Verín derivou nunha fraternidade pouco habitual neste tempo. O rexeitamento é unánime. O acordo sobre a necesidade de manter aberto o servizo é tal que estes días disimula calquera diferenza ideolóxica entre a veciñanza da comarca.
Hai conformidade entre a cidadanía pero tamén entre as forzas políticas que a representan no Concello. Todos os grupos presentes nesta institución -PSOE, BNG e PP- aprobaron, no pleno municipal celebrado esta cuarta feira, unha declaración institucional contra a desaparición da sala de partos.
No seu escrito defenden a sanidade pública como “dereito fundamental” e o Hospital Comarcal de Verín como base “do maior e máis importante servizo público da comarca”.
Marcha atrás
O documento, que trasladan á Consellaría de Sanidade, expresa o “frontal rexeitamento” do Concello á decisión anunciada pola Xunta, o seu “apoio e recoñecemento a todos os profesionais da sanidade pública que desenvolven o seu labor no Hospital Comarcal de Verín”, e toda a “solidariedade coas mulleres embarazadas e as súas familias para que poidan seguir parindo no noso hospital”.
O alcalde de Verín asegura que están traballando en todos os eidos, tamén no xudicial.
Todos os grupos políticos instan á Administración a que revogue a súa decisión e pídenlle que “non só se manteña o actual paridoiro, senón que se reforce coas medidas necesarias tanto de persoal como de recursos para darlle unha total seguridade”. E reclámanlle, ademais, que ese mesmo empeño “se faga extensivo a cantos outros servizos ou especialidades médicas do Hospital” o requiran.
En declaracións a Sermos Galiza, o alcalde socialista Gerardo Seoane asegura que están traballando en todos os eidos, e incide en “todos”, en alusión a unha presumíbel “denuncia xudicial do que consideramos un atentado contra os dereitos das mulleres a decidir onde parir”.
Defendemos o dereito a parir con dignidade perto da súa casa e con toda a calidade asistencial.
Desde o BNG, o tenente de alcalde, Diego Lourenzo, remarca a solidariedade da veciñanza de toda a comarca á hora de exixir a continuidade da unidade de partos de Verín, un servizo que garanta poder “parir con dignidade perto da súa casa”. Porque a desaparición desta unidade, advirte, condena as embarazadas da contorna a ter que “parir no medio do camiño” sen saber quen se fará cargo da “falta de calidade asistencial” que van sufrir cando iso suceda.
O PP de Ourense, contra o peche do paridoiro
Á corrente máis reivindicativa dos grupos da oposición do Goberno galego uniuse nas últimas horas o PP de Ourense mais os grupos populares municipais afectados polo peche do paridoiro de Verín. Piden que se manteña o servizo e urxen á Consellería de Sanidade para que dea marcha atrás e revogue o pechamento.
O PP de Ourense pídelle á Xunta de Galiza que rectifique a súa decisión de pechar o paridoiro de Verín para ser consecuentes e coherentes coa demanda social.
O presidente provincial del PP e responsábel da Deputación, Manuel Baltar, desmarcouse da posición do presidente galego, Alberto Núñez Feixoo; a quen lle trasladou a súa “obriga de defender os intereses de Ourense por riba de calquera outros”. Baltar pídelle á Xunta que “rectifique” para “ser consecuentes e coherentes coa demanda social" que non reclama unha ampliación de servizos, dixo, “senón que se manteñan os que había”.
Na mesma liña manifestouse o voceiro municipal do PP de Verín. En conversa con Sermos Galiza, Juan Manuel Jiménez reiterou que non están de acordo coa decisión. “Respectamos os argumentos dos xefes de pediatría e xinecoloxía” nos que se ampara a Consellaría para tomar a “decisión técnica” de pechar a unidade de partos do hospital comarcal, afirma, “pero se durante 25 anos o servizo funcionou, ao igual que outras moitas especialidades, e as profesionais encargadas de atendelo contribuíron coa súa experiencia non entendemos que non siga adiante”.
Desmantelamento dos hospitais comarcais
Desde o BNG de Verín, Diego Lourenzo sinala a necesidade de que o PP de Ourense faga valer “a súa posición política” para que a Xunta anule o peche. “Se están convencidos da necesidade do servizo cómpre que exerzan a presión necesaria para que a cúpula do seu partido dea marcha atrás”, asegura.
Diego Lourenzo mantén que a decisión da Xunta de pechar o paridoiro de Verín é unha mostra máis da tendencia do Goberno galego cara o desmantelamento do hospital comarcal. “A preocupación da xente é que detrás deste servizo caia cirurxía, e detrás deste, ollos; até convertelo nun gran centro de saúde”. Ese é o medo.