A Policía envía á Fiscalía un informe por un posíbel delito de odio na expulsión de turistas israelís dun local de Vigo
O hostaleiro vigués-libanés explicou en declaracións a Nós Diario que a súa reacción debeuse a que os clientes se estaban comportando de maneira agresiva e provocadora.
A Policía española remitiu á Fiscalía un informe sobre o sucedido hai uns días no restaurante Mimassa de Vigo, por se se produciu un posíbel delito de odio por parte do responsábel do establecemento, Samir Slim, que expulsou da terraza do local un grupo de turistas israelís.
Segundo confirmaron fontes policiais, un cidadán madrileño chamou a dependencias da Comisaría e tamén da Policía Local viguesa, mostrando a súa "indignación" polo sucedido, despois de ver o vídeo que o propio hostaleiro gravou cando botou do seu local eses clientes.
A Brigada de Información da Comisaría viguesa abriu dilixencias e tomou declaración ao empresario, que ten varios restaurantes na cidade. A partir de aí, elaborou un informe que xa remitiu esta sexta feira á fiscal delegada para delitos de odio e discriminación na provincia de Pontevedra.
O vídeo foi gravado polo propio Slim na terraza do restaurante, situado na zona de Areal, e nel pode verse como expulsa un grupo de turistas israelís que estaban a tomar algunhas consumicións na terraza, mentres lles afea que apoien a acción do seu goberno en Gaza. "Se matades palestinos, ides comer a Gaza", recrimináballes mentres os instaba a marchar, e dicíalles que estaban "convidados" ao que pediran, para que deixasen as mesas inmediatamente.
Este hostaleiro explicou en declaracións a Nós Diario que a súa reacción debeuse a que os clientes se estaban comportando de maneira agresiva e provocadora. De feito, no vídeo pode escoitarse a algún dos turistas gritar "Viva Israel", ao que o dono do restaurante responde cunha "Viva Palestina libre".
