A poboación nova, a máis vulnerábel fronte á Delta

As chamadas de atención sobre o avance da variante Delta e os efectos que pode provocar no contexto actual de estabilidade e desescalada non se deixan de repetir. "Sería unha mágoa estragar o traballo de todos estes meses" salientou o presidente da Xunta após recoñecer que non se deben "obviar" os incrementos de casos rexistrados en países como Portugal e o Reino Unido onde Delta (B.1.617.2) xa representa 90% de todas as infeccións provocadas polo SARS-CoV-2. Alberto Núñez Feixoo lembrou tras a reunión semanal do Comité Clínico que a variante procedente da India, "máis transmisíbel e máis resistente ante unha soa dose da vacina", é a responsábel, cando menos, de 25 infeccións positivas de Covid-19 confirmadas por secuenciación xenómica en Vigo e na Coruña. Alén destes rexistros, os datos que manexa o equipo do proxecto CovidBens, revelaron hai unha semana a presenza da variante Delta nas augas residuais da área metropolitana da Coruña, proba de que xa circula entre as 400.000 persoas residentes nos concellos da Coruña, Arteixo, Cambre, Culleredo e Oleiros, que verten as súas augas residuais á depuradora de Bens. Con todo, aseguran desde a Dirección Xeral de Saúde Pública da Xunta da Galiza, aínda é cedo para determinar a frecuencia desta variante entre a poboación. A frecuencia das mutacións propias da Delta detectadas polo grupo que coordina a investigadora do Instituto de Investigación Biomédica da Coruña, Margarita Poza, vai en aumento pero aínda é "baixa" fronte á "predominante" da variante británica Alfa. "É importante salientar que os propios investigadores do proxecto mencionan que a frecuencia das mutacións non se corresponde coa das variantes atopadas, e que están a traballar para poder determinar a frecuencia das variantes na poboación", remarcan desde Saúde Pública. En conversa con Nós Diario, Margarita Poza asegurou que é de esperar que Delta sexa a variante dominante en poucas semanas, calcando o progreso que xa alcanzou no Reino Unido mais na rexión portuguesa de Lisboa e Vale do Tejo. Delta, dominante en agosto Neste sentido, o Centro europeo para a prevención e o control de enfermidades (ECDC) avanzou no seu último informe sobre avaliación de ameazas da variante preocupante Delta a previsión de que 70% das novas infeccións por SARS- CoV-2 na Unión Europea se deban a esta variante a comezos de agosto e 90% a finais dese mesmo mes. "É moi probábel que a variante Delta circule extensamente durante o verán, especialmente entre os individuos máis novos" pendentes de se vacinar, resaltou a directora do ECDC Andrea Ammon."Isto pode supor un risco para que as persoas máis vulnerábeis se infecten e experimenten enfermidades graves e a morte se non están completamente vacinadas". O uso óptimo das vacinas segue sendo a pedra angular da resposta de Saúde Pública A axencia europea confirma unha maior transmisibilidade e un risco superior de hospitalizacións asociado á variante Delta. E precisa: calquera relaxación das medidas durante o verán podería conducir a "un aumento rápido e significativo de casos diarios cunha suba asociada de hospitalizacións e mortes, alcanzando niveis do outono de 2020 se non se toman medidas adicionais". O ECDC constata que aquelas persoas que só recibiron a primeira picada dun ciclo de vacinación de dúas doses están menos protexidas contra a infección provocada por Delta que contra outras variantes, independentemente do tipo de vacina, pero remarca que a vacinación completa "proporciona unha protección case equivalente". Por iso chama a manter as restricións de forma preventiva para evitar a expansión do virus mais a acelerar os plans de inoculación completa da poboación máis vulnerábel: a xente moza e a que ten máis dificultades de acceso ás vacinas. Na Galiza, Saúde Pública defende unha situación epidemiolóxica "o suficientemente favorábel" como para seguir avanzando cara a normalidade, mais tamén recoñece a existencia dun "maior risco de levantar as medidas en presenza dunha variante máis transmisíbel". "O uso óptimo das vacinas segue sendo a pedra angular da resposta de Saúde Pública, xunto á detección temperá continua de casos con rastrexo de contactos, unha forte vixilancia e caracterización dos virus circulantes por secuenciación". Máis casos, máis ingresos O médico internista Nacho Ramil sinala a poboación menor de 55 anos "sen vacinar ou con pautas incompletas" como a máis susceptíbel fronte ao avance da variante Delta. "Desde o punto de vista sanitario non creo que implique problemas de colapso nin de moito consumo de recursos pero si que vai supor máis casos e ingresos, sobre todo de xente nova que vai acabar no hospital cunha patoloxía infecciosa severa". "Nada apunta a que esteamos ante unha variante máis agresiva, simplemente manifesta certo grao de escape á inmunidade que ofrece a primeira dose da vacina". Iso condena a poboación moza, "que se vai mover con máis liberdade nun escenario con menos restricións. Para o virus será mais doado circular, pero se a vacinación avanza, as probabilidades de contaxio decaerán", conclúe.