Os pneumáticos, agás os de bici, deberán ser reutilizados ou reciclados e non poderán botarse en vertedoiros

Os pneumáticos, excepto os de bici, deberán ser reutilizados ou reciclados sempre que sexa posíbel até que sexan valorizados e non poderán botarse nos vertedoiros a partir de mañá, segundo dispón o Real Decreto para mellorar a xestión dos pneumáticos que están fóra de uso e rodalos cara a un modelo de economía circular, que foi aprobado a pasada terza feira polo Consello de Ministros e que publicou onte o Boletín Oficial do Estado.

Entre as medidas que recolle, os pneumáticos grandes xa non poderán ser depositados en vertedoiros, como até o de agora, e estabelécese un sistema de responsabilidade ampliada do produtor.

A nova norma indica a prioridade de reutilizar os pneumáticos e estabelece as condicións que deberán ter os pneumáticos de segundo uso e os recauchutados para a súa nova comercialización. O Real Decreto, segundo o Goberno, acelerará a transición do sector dos pneumáticos fóra de uso cara a un modelo de economía circular.

O texto aprobado polo Executivo modifica o Real Decreto 1619/2005, do 30 de decembro, sobre a xestión de pneumáticos fóra de uso, para lograr unha xestión máis eficaz deste residuo e consolidar os progresos implementados na súa xestión ao longo dos quince anos de vixencia da normativa.

Con iso, adáptanse os novos requisitos da responsabilidade ampliada do produtor que se introducirán a través da transposición da nova Directiva (UE) 2018/851 sobre a materia, para a que o Goberno está a tramitar o anteproxecto de Lei de residuos e chans contaminados.

As medidas do novo Real Decreto inclúen melloras na eficiencia e os resultados do sistema de xestión dos pneumáticos fóra de uso. En concreto, prohíbese depositar en vertedoiros os pneumáticos de gran tamaño, os que teñen un diámetro superior a 1.400 milímetros, e a súa incorporación ao sistema de xestión baixo a responsabilidade ampliada do produtor.

Con todo, para estes pneumáticos as obrigacións serán exixíbeis a partir do 2 de xaneiro de 2021.

Así, todos os pneumáticos de reposto, excepto as rodas das bicicletas, pasan a ser obxecto para a súa reutilización ou reciclaxe e, en todo caso priorizarase a reutilización. Ademais, a norma explica a información que se debe dar ao consumidor sobre os pneumáticos e preferibelmente farase de forma electrónica.

Doutra banda, define para cada ano e territorio as responsabilidades de recollida e xestión que corresponden aos sistemas colectivos de responsabilidade ampliada do produtor, para evitar problemas de acumulación e atrasos na recollida dos residuos nos puntos de xeración.

Esta información servirá ás autoridades competentes nas súas tarefas de supervisión e control das operacións que integran o fluxo de xestión deste residuo. As melloras permitirán máis control e trazabilidade na xestión así como evitar acumular rodas fóra de uso.

Os produtores amplían a súa responsabilidade

O Real Decreto amplía as obrigacións actuais dos produtores de pneumáticos, de modo que quedarán obrigados a xestionalos cantas veces sexa necesario até a súa completa valorización. Tamén se inclúe a xestión do pneumático se volve ser comercializado como produto de segunda man ou recauchutado.

Doutra banda, amplía tamén a definición de produtor de pneumático a aqueles fabricantes de pneumáticos recauchutados no Estado español sobre carcasas importadas e aos importadores de pneumáticos de segunda man ou recauchutados, o que os converte en suxeitos da responsabilidade ampliada da xestión dos pneumáticos fóra de uso.

Tamén terán que cumprir coas devanditas obrigacións os Centros Autorizados de Tratamento (CAT) para os pneumáticos procedentes dos vehículos para os que non dispoñan de xustificación da súa xestión que, até o de agora, non estaban suxeitos a ela.

Os produtores canalizan esta obrigación de xestión a través de sistemas colectivos de responsabilidade, que xestionan a recollida e valorización dos pneumáticos usados en instalacións autorizadas.

O novo Real Decreto habilita o Ministerio para a Transición Ecolóxica a definir os criterios que permitan asignar a responsabilidade que corresponde a cada sistema colectivo e a que sexan publicados na web antes do 15 de marzo de cada ano.

Nese sentido, o Ministerio precisa que traballou xa coas autoridades competentes e entidades locais a proposta de asignación, en cada territorio, da responsabilidade de recollida e xestión que corresponde anualmente aos sistemas colectivos, de forma que se garanta a recollida de todos os pneumáticos xerados no Estado español.

Con estas medidas, o Real Decreto, segundo o Goberno, quere resolver os problemas de xestión cando se exceden as cotas asignadas a cada sistema colectivo de responsabilidade, debido á existencia de pneumáticos —por exemplo, os pneumáticos preparados para a súa reutilización—, que até o de agora non computaban na responsabilidade dos produtores.

O texto regula tamén o procedemento excepcional de recollida nos puntos limpos dos pneumáticos fóra de uso, así como a relación entre os puntos limpos e produtores para custear a recollida e tratamento dos devanditos pneumáticos, para resolver problemas operativos que se rexistraron no pasado.

Neste contexto, tamén se crea dentro do Rexistro de Produtores de Produtos a sección de “produtores de pneumáticos” onde deberán estar rexistrados todos os produtores que introducen pneumáticos de reposición no mercado nacional. Nese rexistro estabelécese a información que deben fornecer os produtores no momento da súa inscrición e a información que deben comunicar cada ano sobre as cantidades e tipos de pneumáticos que introducen no mercado nacional de reposición.

En concreto, os produtores deberán inscribirse no Rexistro de Produtores de Produtos, estabelecida no artigo 15, e a subministración da información sobre pneumáticos postos no mercado nacional de reposición no ano 2020 antes do 2 de abril de 2021.

Finalmente, o Real Decreto apunta tamén que as infraccións contra esta nova norma quedarán sometidas polo réxime sancionador que está regulado na Lei 22/2011, do 28 de xullo, de residuos e chans contaminados.