A Plataforma polo dereito ao aborto pedirá amparo ao Valedor perante a reforma do PP
Chaman a participar a todas as mulleres presentando un escrito no que instan o Valedor a pedir a retirada dun anteproxecto de lei que, din, "adoece de vicios de inconstitucionalidade" e "vulnera" os Dereitos fundamentais.
A Plataforma galega en defensa do dereito ao aborto presentou esta sexta feira máis unha acción para reivindicar o dereito ao aborto e exixir a retirada do anteproxecto de Lei dos dereitos do concibido e da muller grávida.
Através dun escrito que animan a presentar perante o Valedor a todas as mulleres, demandan da institución que as ampare "na protección dos dereitos democráticos que [lles] son inherentes" para o que solicitan, a elaboración dun informe "para que o Goberno da Xunta de Galiza esixa, de forma urxente, a retirada inmediata deste anteproxecto de lei e, caso prosperar a súa aprobación, interpoña recurso de inconstitucionalidade".
Defender os dereitos fundamentais das mulleres
Segundo denuncian desde a Plataforma a reforma presentada polo executivo de Mariano Rajoy "adoece de vicios de inconstitucionalidade" por "afectar e vulnerar" os seus Dereitos fundamentais, a comezar polo principio de igualdade e non discriminación da Constitución española. Aliás, subliñan, "a aprobación do devandito anteproxecto de lei supón o incumprimento por parte do Reino de España dos tratados internacionais asinados relativos a Dereitos Humanos e á non discrimiación".
Neste senso, perante o rexeitamento, en sucesivas ocasións, da Xunta de Galiza "a defender o dereito á igualdade" e os dereitos que "como mulleres" lles asisten demandan que o Valedor do Pobo inste a Xunta a reclamar a "retirada inmediata" da reforma.