Precarias pola Atención Primaria, que agrupa persoal médico eventual do Sergas, rexeita o contrato de “continuidade”, vixente dende o pasado 31 de xaneiro, que afecta tanto a médicos de familia como a pediatras de Atención Primaria. Considera que ese contrato perpetúa a precariedade e pon en perigo o modelo asistencial actual, que aposta en que cada paciente sexa sempre atendido polo mesmo profesional.
Entre as repercusións para o paciente destacan que obriga o médico a traballar en varios centros de saúde da área sanitaria, cubrindo por días a diferentes facultativos, e así durante varios anos. Iso tamén implica que para o médico eventual sexa imposíbel conciliar a vida familiar e laboral pola gran inestabilidade que supón non só o aumento da xornada, senón tamén o ter o 40% do horario do mes sen fixar.
Advirten, ademais, que a aparición da figura de médico de área/pediatra de área supón a desaparición da actual figura do médico de familia, xa que se elimina un dos alicerces fundamentais da Atención Primaria: intentar que cada paciente sexa sempre atendido polo mesmo médico.
Instan a Xunta a convocar oposicións que garantan que se cubran as prazas vacantes das xubilacións e a creación de novas prazas, derivadas non só da masificación das cotas senón tamén da maior complexidade das probas diagnósticas, da maior demanda e do avellentamento da poboación.
