A falta de persoal nas Urxencias do Salnés bloquea o uso das ambulacias do 061
A falta de persoal compromete a calidade asistencial do Servizo Galego de Saúde. A denuncia desde diferentes escenarios da sanidade pública galega é recorrente e esta vez afecta de forma directa ao os servizos de urxencias e emerxencias sanitarias.
Segundo sinalan nun comunicado persoal destas áreas, "debido a carencia crónica de persoal no Servizo de Urxencias do Hospital do Salnés, cada vez é máis habitual que as ambulancias do 061, tanto as de soporte vital básico como a medicalizada, estean retidas no centro hospitalario, esperando a transferir os pacientes".
Bloqueos e atrasos
Segundo detallan, os técnicos de emerxencias están a asumir responsabilidades que realizan habitualmente os celadores en todos os demais servizos de urxencias da Galiza, e "ao bloquearse a transferencia dos pacientes nas padiolas das ambulancias ao servizo de urxencias, as ambulancias non poden atender novas emerxencias".
Os tempos de inoperatividade das ambulancias adoitan ser aínda maiores no caso de pacientes con patoloxía respiratoria, acalaran "dado que na zona Covid deste servizo non dispoñen de ningún celador de forma permanente, obrigando aos técnicos de emerxencias a exporse a riscos innecesarios e atrasando a asistencia urxente dos pacientes alí trasladados".
Neste sentido, tamén remarcan que o hospital do Salnés é o único do territorio que non dispón dunha zona habilitada para a transferencia de pacientes.
Inoperativas por máis tempo
Nesta ocasión, denuncian que a ambulancia medicalizada da 061 da área do Salnés estivo inoperativa á espera de que persoal do centro facilitase unha padiola para realizar a transferencia do paciente, atrasando a asistencia definitiva do paciente en urxencias.
"Ademais do prexuízo directo ao paciente, ao tratarse da única ambulancia de soporte vital avanzado da área do Salnés, que atende emerxencias e patoloxías de persoas dependentes, a retención deste recurso no servizo de urxencias hospitalario supón un risco na calidade asistencial extrahospitalaria da poboación".
O colectivo de profesionais sanitarios piden "sentidiño" e inciden na importancia de minimizar os tempos de transferencia e inoperatividade das ambulancias de urxencias, ademais de por de manifesto os riscos que corren de forma innecesaria dentro do servizo de urxencias, por falta de persoal, ante unha nova vaga da Covid.