Pedro Branco gaba os Premios Nacionais de Investigación: "O futuro da ciencia na Galiza ten rostro feminino"

Pedro Branco recibiu esta cuarta feira as investigadoras recoñecidas cos Premios Nacionais de Investigación. O delegado do Goberno español na Galiza remarcou durante o encontro o peso cada vez maior do talento feminino na ciencia que se fai nos centros e organismos galegos. "O futuro da ciencia na Galiza ten rostro feminino", sinalou e así llelo trasladou a dúas das investigadoras de universidades galegas que foron distinguidas polo Ministerio de Ciencia e Innovación, a quen lles reiterou a aposta do Goberno pola ciencia e a tecnoloxía, con medidas lexislativas como a nova Lei de Ciencia e con máis convocatorias de axudas a investigadoras e mellor financiadas.

Branco, acompañado da subdelegada do Goberno na Coruña, María Rivas, reuniuse con Beatriz Pelaz e con Verónica Bolón, que, xunto con Cristina Blanco, foron galardoadas a semana pasada, dentro da modalidade de investigadoras menores de 40 anos.

Físicas, matemáticas e humanidades

Beatriz Pelaz foi premiada na modalidade 'Felisa Martín Bravo', referente nas ciencias físicas, dos materiais e da terra. É investigadora principal do Centro Singular en Química Biolóxica e Materiais Moleculares (CiQUS) e profesora titular da Universidade de Santiago de Compostela, onde codirixe o grupo BioNanoTools.

Verónica Bolón, que acudiu á reunión acompañada de Moisés Canle, vicerreitor Titulacións e Internacionalización da Universidade da Coruña (UDC), acadou o premio Nacional de Investigación na modalidade 'María Andresa Casamayor', referente nas matemáticas a as tecnoloxías da información e das comunicacións. É profesora titular no Departamento de Ciencias da Computación e Tecnoloxías da Información da UDC e investigadora no Centro de Investigación TIC (CITIC). A elas únese a investigadora Cristina Blanco Sío-López, premiada na modalidade 'María Moliner', referente nas humanidades.

Os Premios Nacionais de Investigación recoñecen o mérito daqueles investigadores e investigadoras, de nacionalidade española, que estean a realizar un labor destacado en campos científicos de relevancia internacional e que contribúan de forma significativa ao avance do coñecemento científico e ao progreso da Humanidade.

Pedro Branco lembrou que este ano o Ministerio de Ciencia incluíu por primeira vez medidas para fomentar a presentación de candidaturas equilibradas, que reflictan a realidade da ciencia en España, na que participan homes e mulleres.