O plan de loita contra o lume da Xunta ( Pladiga) inclúe para a campaña de 2021 vaias novidades, como a creación dunha unidade de investigación de incendios forestais, o incremento de parroquias de alto risco e un aumento da videovixilancia.
Segundo informa a propia Administración, mantense un operativo con 7.000 efectivos entre medios da Consellaría do Medio Rural e outras institucións, cun investimento que atinxe os 180 millóns de euros entre prevención e extinción.
En declaracións á prensa, o conselleiro de Medio Rural, José González, explicou que a nova unidade de investigación estará desvinculada das tarefas de extinción, mentres vai depender directamente da Dirección Xeral de Defensa do Monte e terá competencia en todo o territorio. Ademais, afirma, contará cos medios suficientes para "detectar a aqueles que, de modo intencionado, causan os incendios forestais".
Así o expuxo antes de participar nunha reunión do Consello Forestal para expoñer o Pladiga, paso previo a levar o plan ao Consello da Xunta.
Pola súa banda, fontes da Consellería do Medio Rural explican a Europa Press que as parroquias de alto risco de incendio serán este ano 35, sete máis que as 28 de 2020. Isto representa un aumento de 25%.
Igualmente, haberá melloras tecnolóxicas do servizo, entre as que se atopa facilitar o acceso en tempo real aos equipos de extinción "dos datos que lles permita ser eficientes" nese traballo, segundo apunta o conselleiro. Ademais, incorpóranse 22 videocámaras, que están "a mostrar o seu bo funcionamento". Tamén haberá unha ducia de drons para axudar na prevención e na extinción.
O Pladiga inclúe por terceiro ano consecutivo un plan de prevención, no que se detallan as rozas para realizar, así como o mantemento de pistas e puntos de auga. Preguntado sobre como avanzan as rozas nun contexto de pandemia, José González indica que "se está facendo a limpeza". Con todo, fai un chamamento a propietarios a limpar os seus predios antes do 31 de maio.
Unha vez chegue o 31 de maio, segundo figura na lei de prevención de incendios, a responsabilidade subsidiaria corresponde aos concellos.
Aquel propietario que o 31 de maio non realizase a roza, recibirá unha carta do seu concello na que se lle informa de que se non fai a limpeza, encargarase de forma subsidiaria á empresa pública Seaga para, posteriormente, cargarlles os custos.