Ordes levántase fronte aos plans eólicos
A exposición pública do proxecto para instalar o parque eólico Ardemil, entre Ordes e Mesía, espertou as primeiras sospeitas veciñais o pasado marzo. As semanas seguintes ampliaron o foco de impacto e con el a contestación social, tras coñecerse novas instalacións de aeroxeradores na zona: A Pobra, Gasalla, Lavandeira e Monte Inxerio. Trátase dun único parque que se estendería entre a parroquia de Lesta, en Ordes, e o concello Vilasantar, con milleiros de hectáreas agrogandeiras e decenas de núcleos de poboación afectados. Eis un extracto da reportaxe publicada no Sermos Galiza 298.
“O que fan é retirar eses parques e crear outros de dimensións menores, duns 30 e tantos megavatios, para poder tramitalo a través da Xunta, obviar parámetros que da outra forma non poderían superar e ocultar o impacto conxunto das actuacións. A totalidade da intervención supera os 100 megavatios, o que supón a tramitación ambiental máis complexa do Estado español”, apuntan desde o colectivo veciñal en conversa con Sermos Galiza.
Por este motivo, a plataforma considera que o proxecto debería declararse nulo de pleno dereito. “Hai sentenzas de varios tribunais superiores, e mais do Tribunal Supremo, que din que unha intervención dun parque eólico non se pode fragmentar para obviar a súa tramitación”, recordan. Solicitan ademais que o Goberno galego exclúa a comarca do Plan Sectorial Eólico Galego, por entender que a actividade é incompatíbel co modo de vida e a economía da zona.
[Podes ler a reportaxe íntegra no número 298 de Sermos Galiza, á venda na loxa e nos quiosques]