O Goberno, en contra do criterio do Executivo estatal, avoga por manter a máscara nos recreos
Tamén segue a ser obrigatorio o seu uso nos medios de transporte público, incluíndo os andéns e estacións de autobús ou tren, así como en calquera espazo fechado de uso público ou que estea aberto ao público.
Porén, que acontece cos patios dos colexios, onde malia estar a rapazada ao ar libre poden producirse certas aglomeracións?
A Consellaría de Sanidade vén de aclarar esta cuestión a través dun comunicado: "As persoas expertas do subcomité clínico lembran que esta cuarta feira comenzou administrarse a segunda dose da vacina contra a Covid-19, polo que, até que as mozas e mozos teñan a pauta completa, o recomendábel é seguir coa máscara onde haxa un número elevado de persoas que compartan un mesmo espazo exterior, un espazo onde habitualmente toman bebidas ou alimentos".
Deste modo, a Xunta "recomenda" que a sociedade siga "actuando con responsabilidade", ao tempo que lamenta que a norma "non sexa máis explícita, posto que pode dar cabida a interpretacións, ao entrar en contradicións coas normas previstas no protocolo estatal".
De feito, Catalunya, Estremadura, Cantabria, Madrid, País Valencià, Castela e León, Castela-A Mancha e Asturies xa confirmaron a retirada da máscara dos recreos, e a ministra de Educación, Pilar Alegría, celebrou a noticia esta quinta feira: "Volver ver os seus sorrisos é unha gran noticia".
Con todo, o presidente da Xunta, Alberto Núñez Feixoo, apuntaba esta cuarta feira que consultará ao comité clínico a posibilidade de mantela obrigatoria no patio dos colexios.