Fiscal de Medio Ambiente: "Nunca detectamos trama organizada ningunha"
Para Álvaro García Ortiz, fiscal delegado de medio ambiente en Galiza, o principal atranco á hora de xulgar presuntos delitos por incendio atópase na "dificultade da proba". E afirma que, malia levar anos investigando, nunca detectou "trama organizada ningunha". Prudente, asegura que o organismo xudicial fará propostas ao respecto unha vez reflexionen con certa distancia.
-Por que tan poucos detidos por incendios chegan a xuízo?
-Pola dificultade de atopar probas. Mais a pregunta sería por que de tantos incendios hai tan poucos detidos. E na miña opinión é pola dificultade de atopar probas. O que parece un fracaso policial é o Estado de dereito, que garante que unha persoa só vai a xuízo se hai probas abondo.
-Cantas sentenzas hai?
-En 2016 houbo 34 sentenzas por incendio forestal. E 28 escritos de acusación da fiscalía que aínda non chegaron a xuízo. Temos o récord absoluto de toda España.
-Cada vez que acontece unha vaga de incendios, xorden voces que piden endurecer as penas. Axudaría a reducir a incidencia do lume?
-A reforma do Código Penal fíxose en 2015 e endurecéronse as penas por incendio forestal. Só pasaron dous anos, e aínda non podemos saber se ese endurecemento funciona ou non. Agora mesmo, unha condena por incendio forestal pode chegar aos 20 anos de prisión. Cada un pode avaliar se é abondo ou non.
-Unha policía propia da Xunta mellor dotada, contribuiría a unha maior eficacia contra os incendios?
-As propostas imos facelas con máis tempo para a reflexión, e seguramente a través da Fiscalía. Mais a miña opinión é que se trata dun delito moi difícil de investigar. Aínda que sempre se pode mellorar, por suposto, na Fiscalía ou no terreo policial.
-Percibe intereses económicos por detrás do lume?
-Depende do que entendamos por intereses económicos. Se falamos de intereses económicos moi particulares, como o de cambiar un cultivo ou porque así limpa un monte, daquela si. Se falamos de intereses económicos xerais, urbanísticos ou madereiros, nunca os detectamos. E levamos anos investigando.
-E tramas organizadas?
-Nunca atopamos evidencia ningunha de ningunha trama. Dígoo con prudencia, porque nun futuro se cadra aparece. Mais até agora non.
-Parécelle axeitada a expresión "terrorismo incendiario"?
-Non podo pronunciarme sobre iso. Pero quero entender que é unha forma de lle dar gravidade a algo que causa moito dano e moita dor.