Novo aumento de casos activos de coronavirus na Galiza
Son 317, catro máis que na xornada anterior.
Novo aumento na Galiza de casos activos de coronavirus, unha tendencia que se rexistra desde a aparición de rebrotes como o da Mariña.
A Dirección Xeral de Saúde Pública da Consellería de Sanidade informa que, na última actualización, esta quinta feira, o número de casos activos de coronavirus en Galiza é de 317, catro máis que na xornada anterior.
Deles 73 son da área da Coruña, 64 da de Lugo (12 máis), 18 da de Ourense, 6 da de Pontevedra, 122 da área de Vigo, 24 da de Santiago, e 10 da de Ferrol.
Do total de pacientes positivos, 4 están en unidades de hospitalización e 313 no domicilio. Non hai pacientes positivos en UCI.
Polo de agora, na Galiza hai un total de 10.649 persoas curadas, rexistrándose 619 falecementos.
O número de PCR realizadas é de 188.328.
En canto a residencias, mantense un único caso activo, que afecta un traballador. Faleceron 274 residentes durante a pandemia.